Qarjy mınıstri óńirlerdiń kiris josparlaryndaǵy «qýlyqty» áshkereledi

ASTANA. QazAqparat - Barlyq derlik óńir qańtarǵa arnalǵan kiris josparlaryn byltyrǵy jylǵydan 60 paıyzǵa tómen bekitken. Bul týraly búgin Úkimet otyrysynda QR Qarjy mınıstri Álıhan Smaıylov aıtty, dep habarlaıdy QazAqparat tilshisi.

«Transfertterdi esepke almaǵanda memlekettik bıýdjettiń kiristeri 593 mlrd teńgeni qurady. Byltyrǵy jyldyń qańtar aıyndaǵy kórsetkishpen salystyrǵanda olardyń ósý qarqyny 128 paıyzdy qurady. Bıýdjetke 130 mlrd teńge kiris kóp tústi. Respýblıkalyq bıýdjetke 428 mlrd teńge kiris tústi. Bul jospardan 47,6 mlrd teńgege, al byltyrǵy jyldyń uqsas kezeńiniń kórsetkishinen 129 mlrd teńgege artyq. Ósý qarqyny - 143,1 paıyz», - dedi mınıstr.

Onyń dereginshe, jospardyń asyra oryndalýy negizinen korporatıvtik tabys pen qosymsha qun salyqtary esebinen júzege asty. Jergilikti bıýdjetterdiń óz kiristeri 43 mlrd teńgege artyǵymen oryndalyp, 166 mlrd teńgeni qurady. Asyra oryndalý somasynyń 81 paıyzy, ıaǵnı 35 mlrd teńgesi salyqtyq túsimderge tıesili.

«Bul jerde aıtyp ótetin másele - Astana kalasy men Almaty oblysynan basqa barlyq óńirlerdiń kiristeriniń jospary byltyrǵy jyldyń faktisinen ortasha alǵanda 60 paıyzǵa tómen bekitilgen. Sondyqtan jergilikti atqarýshy organdar kiristerdiń josparyn qaıta qarap, taldaýy qajet», - dedi Álıhan Smaıylov.