Qarjy mınıstri memlekettik qaryzǵa qatysty pikir bildirdi
Búgin Senattyń jalpy otyrysynda depýtat Shákárim Buqtuǵutov 2022 jyldyń 1 qańtarynda memlekettik qaryz somasy 21,9 trln teńgeni quraǵanyn, al bir jyldan keıin bul kórsetkish 25,3 trln teńgege deıin óskenin aıtty.
Osy oraıda ol Qazaqstannyń syrtqy qaryzdary boıynsha tolyqqandy aýdıt júrgizý jáne tartylǵan qarjynyń ekonomıkalyq tıimdiligi jóninde suraq qoıdy.
«Memlekettik qaryz máselesi Úkimettiń turaqty baqylaýynda tur. Álemde ınflıatsııanyń deńgeıi óte joǵary ekeni belgili. Sondyqtan bazalyq stavka da ósken. Bul turǵyda syrttan qarajat tartý nemese bıýdjet tapshylyǵyn qarjylandyrý úshin ishten qaryz alý qymbatqa túsedi. Árıne, ınflıatsııa deńgeıi tómendese, bazalyq stavka azaısa, bul júkteme birshama jeńildeıdi», - dedi E. Jamaýbaev.
Sonyń qatar ol bıyl elimizdegi bıýdjet kirisi ósetinin aıtty.
«Ekinshiden, elimizdegi bıýdjet tapshylyǵyn birtindep azaıtamyz. Onyń deńgeıin bıyl 2,7 paıyz shamasynda qaldyrdyq, sebebi ony ósirýge bolmaıdy. Osy oraıda onyń somasy 3,2 trln teńgeni qurady. Bıylǵy naqtylaýdan keıin bıýdjettiń kiris kózi taǵy da 42 paıyzǵa ósedi. Bul turǵyda salyq ári kedendik ákimshilendirý esebinen 720 mlrd teńge qosymsha qarastyryp otyrmyz», - dedi mınıstr.
«Qazir negizinen ishki naryqtan qarajat tartyp otyrmyz. Memlekettik qaryz jalpy ishki ónimge shaqqanda 32 paıyzdan aspaıdy dep eskerilgen», - dedi E. Jamaýbaev.
Budan buryn habarlanǵandaı, Bıylǵa arnalǵan respýblıkalyq bıýdjettiń parametrleri kelesideı qalyptasty, ıaǵnı bıýdjet túsimderi 1,5 trln teńgege ulǵaıa otyryp, 19,3 trln teńgeni quramaq. Tapshylyq Jalpy ishki ónimge qaraǵanda 2,7% deńgeıinde saqtaldy. Respýblıkalyq bıýdjettiń shyǵystary 22,5 trln teńge kóleminde josparlanyp otyr.
