Qarjy mınıstri kvazımemlekettik sýbektilerdiń shottaryndaǵy qaldyqtarǵa qatysty túsinik berdi

NUR-SULTAN. QazAqparat – Ulttyq qordyń jınaqtaý fýnktsııasy kúsheıtiledi. Bul týraly Májilistiń jalpy otyrysynda QR Úkimetiniń 2019 jylǵy respýblıkalyq bıýdjettiń atqarylýy týraly esebin qaraý kezinde Qarjy mınıstri Erulan Jamaýbaev málim etti, dep habarlaıdy QazAqparat tilshisi.

«Byltyr Ulttyq qorǵa 4,5 trln teńge tústi. Qordy basqarýdan túsken ınvestıtsııalyq kiris 1,6 trln teńge boldy. 2019 jyldyń sońynda qor aktıvteri 27,5 trln teńgeni qurady. Esep aıasynda bıýdjettiń basty basymdyqtaryn negizinen Ulttyq qordan alynatyn transfertter arqyly qarjylandyrý daǵdyǵa aınalǵany aıtyldy. Bıýdjet kodeksiniń jobasy Ulttyq qordyń jınaqtaý fýnktsııasyn kúsheıtýge baǵyttalǵanyn atap ótkim keledi», - dedi mınıstr.

Sonymen qatar ol kvazımemlekettik sýbektilerdiń shottaryndaǵy ıgerilmegen qaldyqtardy tıisti bıýdjetke qaıtarý máselesine toqtaldy.

«Sondaı-aq kvazımemlekettik sektor sýbektileriniń dıvıdendtik saıasatynyń kemshilikteri týraly da aıtyldy. Aǵymdaǵy saıasatty ózgertý úshin Úkimet tıisti qaýly qabyldady. Oǵan sáıkes kvazımemlekettik sýbektiler 2019 jyldyń qorytyndysy boıynsha ózderiniń taza tabysynyń 100 paıyzyna deıingi mólsherde respýblıkalyq bıýdjetke dıvıdend retinde tóleýdi qamtamasyz etedi. Jyl saıyn talqylanatyn máselelerdiń biri – bul kvazımemlekettik sýbektilerdiń shottaryndaǵy qaldyqtarǵa qatysty. Kvazımemlekettik sýbektilerdiń shottaryndaǵy ıgerilmegen qaldyqtardy bıýdjetke qaıtarý týraly Parlament usynys bergen bolatyn. Qazir bul jumys bastaldy. Bıylǵy 1 maýsymdaǵy jaǵdaı boıynsha respýblıkalyq bıýdjetke 8,6 mlrd. teńge qarajat qaıtaryldy», - dedi E. Jamaýbaev.

Budan buryn habarlanǵandaı, Májilistiń jalpy otyrysynda Qarjy mınıstri memlekettik josparlaý júıesin jetildirý sharalary daıyndalyp jatqanyn atap ótti.