Qarjy mınıstri korporatıvtik tabys salyǵyna áser etken faktorlardy atady

NUR-SULTAN. QazAqparat – Qarjy mınıstri Erulan Jamaýbaev Úkimet otyrysynda osy jyldyń 10 aıynyń qorytyndysy boıynsha memlekettik bıýdjettiń atqarylý kórsetkishi týraly aıtty, dep habarlaıdy QazAqparat tilshisi.

Mınıstrdiń aıtýynsha 10 aıdyń ishinde memlekettik bıýdjetke 6,8 trln teńge somasynda kiris túsip, jospar 94,7%-ke atqarylǵan.

«Respýblıkalyq bıýdjetke 4 trln 264 mlrd teńge somasynda kiris keldi (jospar 86,5%-ke atqaryldy). Kirister boıynsha jospardyń atqarylmaý kórsetkishi 667 mlrd teńgeni qurady. Onyń ishinde salyqtar kórsetkishi – 820 mlrd teńge. Bul rette salyqtyq emes túsimder 154 mlrd teńgege artyǵymen oryndalǵanyn atap ótý kerek», - deıdi mınıstr.

Erulan Jamaýbaev eldegi korporatıvtik tabys salyǵynyń atqarylmaýyna birqatar faktor áser etkenin jetkizdi.

«Atap aıtqanda negizgi eksporttyq pozıtsııalar boıynsha baǵa orta eseppen 12,5%-ke quldyrady. Sondaı-aq osy jyldyń 9 aıynda jyldyń basymen salystyrǵanda áreketsiz salyq tóleýshiler sany 8,1 myńǵa, onyń ishinde zańdy tulǵalardyń 4,8 myńǵa ulǵaıdy. Kásiporyndardyń kútiletin kiristeriniń túspeýi de sebepterdiń biri. Naqtyraq aıtqanda osy jyldyń 10 aıynda respýblıkalyq bıýdjetke korporatıvtik tabys salyǵyn tóleýshilerdiń jartysy ótken jyldyń sáıkes kezeńimen salystyrǵanda korporatıvtik tabys salyǵy boıynsha avanstyq tólemderdi azaıtty. Ekinshi deńgeıdegi bankterden túsetin túsimder 11,8 mlrd teńgege tómendedi», - dedi ol.