Qarjy mınıstri: Koronavırýstyń ekinshi tolqynyn eńserýge de qarajat jetkilikti

NUR-SULTAN. QazAqparat – Koronavırýstyń ekinshi tolqyny bolsa, ony eńserýge Qazaqstannyń qarjysy jete me? Bul suraq OKQ-da uıymdastyrylǵan baspasóz máslıhatynda Qarjy mınıstri Erulan Jamaýbaevqa qoıyldy, dep habarlaıdy QazAqparat tilshisi.

«Koronavırýstyń birinshi tolqynyn eńserý úshin bıýdjetten 153,4 mlrd teńge bólingen bolatyn. Onyń 26,6 mlrd teńgesi – Úkimettiń rezervi bolsa, 125,3 mlrd teńgesi naqtylanǵan respýblıkalyq bıýdjet kezinde bólingen. Sonymen birge, 1,5 mlrd teńge Bilim jáne ǵylym mınıstrliginiń bıýdjetinen aýdaryldy. Jalpy jaǵdaı qalaı qalyptasady, koronavırýsqa qatysty ahýal ne bolady – oǵan qaraı ekonomıkalyq jaǵdaı qalaı ózgeretinin kóre jatarmyz. Jalpy Úkimettiń rezervi men naqtylanǵan bıýdjette tıisti qarajat bar», - dedi Erulan Jamaýbaev.

Eske sala ketsek buǵan deıin Erulan Jamaýbaev Qazaqstannyń ulttyq qoryna byltyr 4,5 trln teńge qosylǵanyn málim etken bolatyn. Onyń aıtýynsha 2019 jyldyń qorytyndysy boıynsha, Ulttyq qor qarajaty shamamen 27,5 trln teńgeni nemese 65,5 mlrd dollardy qurady. Ótken jyly Ulttyq qorǵa shamamen 4,5 trln teńge, onyń ishinde munaı sektory uıymdarynan túsetin tikeleı salyqtar túsimderi esebinen 2,8 trln teńge túsken.