Qarjy mınıstri Esep komıtetiniń eskertýine jaýap berdi

NUR-SULTAN. QazAqparat – Ulttyq qorda aktıvterdi kóbirek jınaýǵa múmkindik jasalady. Bul týraly Senattyń jalpy otyrysynda Premer-Mınıstrdiń orynbasary – Qarjy mınıstri Erulan Jamaýbaev málim etti, dep habarlaıdy QazAqparat tilshisi.

«Esep komıtetiniń qorytyndysynda memlekettik josparlaý júıesindegi, bıýdjettiń kiris bóliginiń atqarylýy men memlekettik qarajatty paıdalaný tıimdiligine qatysty birqatar másele atap ótildi. Olardyń barlyǵy jumys toptarynda egjeı-tegjeıli talqylandy.

Negizgi eskertýler men usynystarǵa túsindirme berip óteıin. Esep komıteti Ulttyq qordan beriletin nysanaly transfertter somalarynyń ulǵaıýyn atap ótken. Degenmen, transfertterdiń ósýi áleýmettik mindettemelerdi, daǵdarysqa qarsy sharalardy, memlekettik baǵdarlamalardy qarjylandyrý jáne pandemııa jaǵdaıynda ekonomıkadaǵy iskerlik belsendilikti qoldaý qajettigimen baılanysty boldy», - dedi E. Jamaýbaev.

Onyń aıtýynsha, byltyr Ulttyq qorǵa tikeleı salyq túsimderiniń kólemi aldyńǵy jylmen salystyrǵanda 1,8 esege ulǵaıdy.

«Bıyldan bastap kepildendirilgen transferttiń mólsherin aıqyndaý kontrtsıkldik bıýdjet qaǵıdalaryna negizdeletin bolady. Jańa tásilge sáıkes, Ulttyq qordan bıýdjetke alynatyn qarajat oǵan munaı sektorynan túsetin kiristerden aspaıtyn bolady. Bul onyń jınaqtaý fýnktsııasyn kúsheıte otyryp, aktıvterdi kóbirek jınaýǵa múmkindik beredi», - dedi Premer-Mınıstrdiń orynbasary.

Budan buryn habarlanǵandaı, E. Jamaýbaev jalpy sıpattaǵy transfertterdi kóbirek alý úshin jergilikti jerde salyq bazasyn kemitip kórsetý faktilerine qatysty Esep komıtetiniń eskertýi oryndy ekenin aıtty.

Sonymen qatar ol memleket boryshy qaýipsiz deńgeıde saqtalyp turǵanyn atap ótti.