Qarjy mınıstri bıýdjet tapshylyǵy men syrtqy qaryzǵa qatysty túsinik berdi
«Jalpy bıýdjet tapshylyǵy artyp otyrǵan joq. Kerisinshe, jyl saıyn jalpy ishki ónimge shaqqanda bul kórsetkishti azaıtyp otyrmyz. Bıyl 3,3 paıyz bolsa, kelesi jyly 2,7 paıyzǵa deıin túsemiz. Odan keıingi jyldary 2,5 paıyzǵa deıin azaıady. Atap aıtqanda, bizdiń ekonomıkamyz ósip keldi. Sonymen qatar qarjylandyratyn baǵyttar kóp ekenin eskersek, bıýdjet tapshylyǵy bolady. Bıýdjet tapshylyǵy bolmas úshin kerek qarajatty Ulttyq qordan tolyǵymen jabý qajet. Alaıda biz Ulttyq qorǵa túsetin qarajatty saqtap, onyń somasyn arttyrý baǵytynda bıýdjet tapshylyǵyna baryp otyrmyz», - dedi E. Jamaýbaev Parlament Májilisinde tilshiler saýalyna jaýap bere otyryp.
Onyń aıtýynsha, álemdegi aýqymmen salystyrǵanda Qazaqstandaǵy bıýdjet tapshylyǵy eleýli somany quramaıdy.
«Dúnıejúziniń aýqymymen qaraǵanda, bizdegi bıýdjet tapshylyǵy (jalpy ishki ónimge qatysty 3,3 paıyz) sonshalyqty kóp emes. Munymen qosa, bizdiń syrtqy qaryz 24 paıyzdan (jalpy ishki ónimge shaqqanda) aspaıdy. AQSh-tyń, Eýropa elderiniń syrtqy qaryzdary 100 paıyzdan asyp ketedi», - dedi Qarjy mınıstri.
Budan buryn habarlanǵandaı, Halyqaralyq qaıta qurý jáne Damý bankiniń qaryzy Qazaqstan Respýblıkasyna 345 mln eýro somasynda 2,5 jyldyq jeńildikti kezeńdi qosa alǵanda, 11,5 jyl óteý merzimimen beriledi.
2025 jylǵa qaraı eliımizde bıýdjet tapshylyǵy 2,5 paıyzǵa deıin tómendeıdi.
