Qarjy mınıstri bıýdjet qarajatyn ıgermeı otyrǵandarǵa shara qabyldaýdy surady
Respýblıkalyq bıýdjettiń shyǵystary 7 trln 092 mlrd teńgeni quraǵan.
«1 qyrkúıektegi jaǵdaımen salystyrǵanda, bıýdjet qarajatyn ıgerý kórsetkishi jaqsardy. 6,5 mlrd teńgelik únemdeý somasyn eseptemegende, 47,1 mlrd teńge ıgerilmedi. Bul 8 aıdaǵy kórsetkishten 33 mlrd teńgege az (80,1 mlrd teńge-avt.)», - deıdi Álıhan Smaıylov.
Mınıstr baıandamasynda atap ótkendeı, naqtylanǵan respýblıkalyq bıýdjettiń jobasynda jyl basynan beri ıgerilmeı kelgen bıýdjettik baǵdarlamalardyń biraz qarajaty ońtaılandyrylǵan.
«Bıýdjet qarajatynyń tıimdi paıdalanýyn sıpattaıtyn kórsetkishterdiń biri - kvazımemlekettik sektor sýbektileriniń shottaryndaǵy qaldyqtardyń kólemi. Olardyń kólemi 59,2 mlrd teńgeni quraıdy. Ol jyl basynan salystyrǵanda 15 mlrd teńgege azaıdy. Biraq aıtyp ótý qajet, 41,5 mlrd teńge ótken jyldardan beri ıgerilmeı kele jatqan qaldyqtar», - deıdi ol.
Álıhan Smaıylov óz sózinde tıisti memlekettik organdar men ulttyq holdıngterge, kompanııalarǵa qarajatty ıgerý boıynsha sharalar qabyldaýdy usyndy.
«Jergilikti bıýdjetterdiń shyǵysy 3 trln 496 mlrd teńgeni qurady. Atqarylmaǵany - 32 mlrd teńge. Bul ótkeng uqsas kezeńmen salystyrǵanda eki esege kem (2017 jylǵy 1 qazanda - 64 mlrd teńge). Neǵurlym kóp ıgerilmeý kelesi óńirlerde qalyptasty: Astana qalasy (4,9 mlrd teńge), Túrkistan (2,1 mlrd teńge), Qyzylorda oblystary (1,9 mlrd teńge), Almaty qalasy (1,4 mlrd teńge), Mańǵystaý oblysy (1,1 mlrd teńge)», - deıdi Qarjy mınıstri.
Eske sala ketsek, ótken aıda QR Premer-Mınıstri Baqytjan Saǵyntaev bıýdjet qarajatyn ıgere almaǵan birqatar ákimdi synaǵan edi.
Al Elbasy bıylǵy joldaýynda Úkimet Ulttyq bankpen birlesip, osy qarajattyń kózdelgen maqsatqa jumsalýyn qatań baqylaýdy qamtamasyz etýi kerek degen bolatyn.
