Qarjy mınıstri aldaǵy jyldardaǵy bıýdjettiń kiristeri týraly aıtty

NUR-SULTAN. QazAqparat – Respýblıkalyq bıýdjettiń kiristeri 2022 jyly 9,2 trln teńgeni quraıdy. Bul týraly Úkimet otyrysynda QR Qarjy mınıstri Erulan Jamaýbaev málim etti, dep habarlaıdy QazAqparat tilshisi.

«Sizderdiń qaraýlaryńyzǵa «2022 - 2024 jyldarǵa arnalǵan respýblıkalyq bıýdjet týraly» Zań jobasy usynylyp otyr. Zań jobasy bıýdjet zańnamasynyń sońǵy ózgeristerin eskere otyryp, elimizdiń 2025 jylǵa deıingi áleýmettik-ekonomıkalyq damý boljamy negizinde ázirlendi. Bul árbir azamattyń ál-aýqatyn jaqsartýǵa jáne ekonomıkany birtindep qalpyna keltirýge baǵyttalǵan. 2022 jyly túsimder bıyldyń josparymen salystyrǵanda 431 mlrd teńgege ulǵaıa otyryp, 13 trln teńge deńgeıinde boljandy. Munaıly emes túsimder 1,8 trln teńgege nemese 25,1%-ǵa ulǵaıýmen qarastyryldy», - dedi E. Jamaýbaev.

Onyń aıtýynsha, munaıdan túsetin túsimderdi birtindep Ulttyq qordyń qarajatyn jınaqtaý rejımine oralýǵa baılanysty 1,3 trln teńgege tómendetý qarastyrylǵan.

«Ulttyq qordan kepildendirilgen transfert kelesi jylǵa 2,4 trln teńge mólsherinde anyqtaldy, ol birtindep 2024 jyly 2,0 trln teńgege deıin tómendeıdi. Nátıjesinde, munaıly emes túsimderdiń úlesi aǵymdaǵy jyly 56,4%-dan 2024 jyly 71,4%-ǵa deıin ósetin bolady», dedi mınıstr.

«Respýblıkalyq bıýdjettiń kiristeri 2022 jyly 9,2 trln teńgeni, 2023 jyly-

9,7 trln teńgeni, 2024 jyly 10,4 trln teńgeni quraıdy. Bıýdjet tapshylyǵy 2022 jyly jalpy ishki ónimniń 3,3%-nan kezeń-kezeńmen 2024 jyly jalpy ishki ónimniń 2,5%-na deıin tómendeýimen josparlanǵan. Bul rette munaıly emes tapshylyq kórsetilgen kezeńde jalpy ishki ónimniń 8,1%-nan 6,3%-ǵa deıin tómendeıdi», - dedi vedomstvo basshysy.