Qarjy komıtetinde tórt zań jobasy qaraldy - Senat
ASTANA. QazAqparat - Búgin Qazaqstan Respýblıkasy Parlamenti Senaty Qarjy jáne bıýdjet komıtetinde «Qazaqstan Respýblıkasynyń Úkimeti men Sıngapýr Respýblıkasynyń Úkimeti arasyndaǵy Tabysqa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly kelisimge ózgerister men tolyqtyrýlar engizý týraly Qazaqstan Respýblıkasynyń Úkimeti men Sıngapýr Respýblıkasynyń Úkimeti arasyndaǵy hattamany ratıfıkatsııalaý týraly» zań jobasy qaraldy.
Hattama 2013 jylǵy 9 sáýirde Sıngapýr qalasynda jasalǵan bolatyn.
Hattama salyqtardan jaltarýǵa jol bermeý maqsatynda salyq salý máseleleri boıynsha aqparat almasý arqyly Ýaǵdalasýshy eki memlekettiń salyqtyq qurylymdarynyń yntymaqtastyǵyn keńeıtýdi kózdeıdi.
Hattamamen eki memlekettiń ortalyq bılik organdaryna Kelisimniń erejeleri bóliginde naqtylaý engizilgen.
Komıtette sondaı-aq «Qazaqstan Respýblıkasynyń azamattaryna, oralmandarǵa jáne Qazaqstan Respýblıkasynda turýǵa yqtııarhaty bar tulǵalarǵa olardyń múlikti jarııa etýine baılanysty raqymshylyq jasaý týraly» zań jobasy qaraldy.
Zań jobasy múlikti, onyń ishinde buryn zańdy ekonomıkalyq aınalymnan shyǵarylǵan aqshany memlekettiń bir márte jarııa etilýin júzege asyrýyna baǵyttalǵan.
Jarııa etilýge: aqsha, qundy qaǵazdar, zańdy tulǵanyń jarǵylyq kapıtalyna qatysý úlesi, basqa adamǵa rásimdelgen qozǵalmaıtyn múlik, qurylys erejelerine sáıkes ǵımarat (qurylys), sondaı-aq olar ornalasqan maqsatty jer telimderi, Qazaqstan Respýblıkasynyń aýmaǵynan tys jerde ornalasqan jyljymaıtyn múlik jatady.
Bul rette jeke adamǵa, menshikke, konstıtýtsııalyq qurylys negizderi men memleket qaýipsizdigine, ekologııaǵa qarsy qylmystar, sybaılas jemqorlyq jáne osy zań jobasynda belgilengen basqa qylmystar jasaý nátıjesinde alǵan múlikter jarııa etilýge jatpaıdy. Sondaı-aq quqyǵy sot tártibi boıynsha joıylǵan múlik, nesıe retinde alynǵan aqsha jáne zań jobasymen kórsetilgen basqa da múlikter jarııa etilýge jatpaıdy.
Múlikti jarııa etý merzimi 2014 jylǵy 1 qyrkúıekten 2015 jylǵy 31 jeltoqsan aralyǵynda belgilendi.
Jarııa etý sýbektileri Qylmystyq jáne Ákimshilik quqyq buzý kodeksteriniń baptarynda kózdelgen qylmystyq jáne ákimshilik jaýaptylyqtan, sondaı-aq tolyq emes, dál emes deklaratsııalar men málimetter bergeni nemese bermegeni úshin tártiptik jaýaptylyqtan bosatylady.
Komıtette «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń azamattaryna, oralmandarǵa jáne Qazaqstan Respýblıkasynda turýǵa yqtııarhaty bar tulǵalarǵa olardyń múlikti jarııa etýine baılanysty raqymshylyq jasaý máseleleri boıynsha ózgeris pen tolyqtyrýlar engizý týraly» zań jobasy da qaraldy.
Zań jobasy Azamattyq, Bıýdjet kodeksterine, «Salyq jáne bıýdjetke tólenetin basqa da mindetti tólemder týraly» (Salyq kodeksi) kodeksine tolyqtyrýlar engizýdi kózdeıdi.
Odan basqa, komıtettiń keńeıtilgen otyrysynda «Qazaqstan Respýblıkasynyń keıbir zańnamalyq aktilerine memlekettik basqarý máseleleri boıynsha ózgerister men tolyqtyrýlar engizý týraly» zań jobasy da qaraldy.
Zań jobasy elimizdiń jańa Bıýdjet tujyrymdamasyn, túpki nátıjelerge baǵdarlanǵan Memlekettik josparlaý júıesin jetildirý tujyrymdamasyn, sondaı-aq Memleket basshysynyń jekelegen tapsyrmalaryn iske asyrý maqsatynda ázirlendi.
Zań jobasy ot tórt zańnamalyq aktige, onyń ishinde bes kodekske ózgerister men tolyqtyrýlar engizýdi kózdeıdi.
Tujyrymdamalyq turǵyda maquldanǵan zań jobalary Palatanyń qaraýyna jiberildi.
