Qarjy aǵyndarynyń 30%-ǵa jýyǵy jasyryn qalyp otyr - Ábilqaıyr Sqaqov
Aýyl sharýashylyǵy basqarmasynyń jumysyndaǵy sybaılas jemqorlyqtyń aldyn alý sharalary týraly vedomstvo basshysy Serik Batyrǵojınov málim etti.
Onyń aıtýynsha, agroónerkásiptik keshen salasynda sýbsıdııa berý úshin qoldanylatyn «Qolday» júıesiniń qoldanýshylary tarapynan suraqtar kóptep týyndaıdy. Osy máseleni sheshý úshin sybaılas jemqorlyqqa qarsy qyzmet ókilderi fermerlerdiń kez kelgen suraǵyna jaýap beretin front-keńse ashý kerek dep esepteıdi.
- AÓK-de tsıfrlyq júıe óte qajet. Bizde qansha egis alqaby, qansha mal basy, qandaı sýbsıdııalar tólenedi - osy derekterdiń barlyǵy bir jerde jınalýy tıis. Turǵyndar aldynda ashyq bolý kerek jáne ár isti ashyq júrgizý kerek. Sonymen qatar, bul málimetterdiń bazalary basqalarmen biriktirilýi kerek. Sonda ǵana aýyl sharýashylyǵyna ınvestıtsııalar túsedi, - dep atap ótti óńir basshysy Ábilqaıyr Sqaqov.
Pavlodar oblysynyń medıtsınalyq mekemeleriniń qyzmetin de ashyq etý usynyldy. «Ertis-adaldyq alany» jobalyq keńsesi ókilderiniń pikirinshe, bul úshin jurtshylyqty aýrýhanalardaǵy baqylaý keńesterine qosý qajet.
- Búginde «Memlekettik múlik týraly» zańy boıynsha memleket qatysatyn kásiporyndar janynan qurylatyn baıqaý keńesteri ashylyp, jabyq rejımde jumys istep jatyr. Bul keńesterdiń quramynda kim bar? Quramdardy oblystyq densaýlyq saqtaý basqarmasy tek ishki buıryqtarmen bekitti me? Jyl qorytyndysy boıynsha quram syıaqy aldy ma jáne qandaı? Keńes múshelerin taǵaıyndaýdyń adal tetigin bylaı jasaýǵa bolady: BAQ-ta kandıdattardy irikteý týraly habarlandyrý jarııalaý kerek, al konkýrs ótkizilgennen keıin oblystyq densaýlyq saqtaý basqarmasy baıqaý keńesin quratyn bolady,-dedi jobalyq keńseniń basshysy Rızabek Isabekov.
Oblys ákimi barlyq memlekettik organdar azamattyq qoǵam ókilderimen yntymaqtastyqta jumys isteýi tıis ekenin eskertti.
- Qoǵam aldynda týyndaıtyn problemalardy ashyq kóterý qajet. Men basshylardy olardyń jabyq bolǵany úshin birneshe ret synǵa alǵan edim. Jergilikti oryndardaǵy ákimder men oblystyq basqarmalardyń basshylary óz jumystaryn jurtshylyqpen belsendi talqylaýy tıis. Muny jasamaıtyndardy qolǵa alatyn bolamyz,- dedi Ábilqaıyr Sqaqov.
Sybaılas jemqorlyqqa qarsy is-qımyl komıssııasynyń otyrysynda ekonomıkalyq tergeý departamentiniń basshysy Arman Júnisov bıýdjet qarajatyn jymqyrý shemalary jaıly aıtty. Osyndaı shemalardyń biri boıynsha Pavlodardyń turǵyny qurylys-montajdaý jumystaryn júrgizýge lıtsenzııasy bar 8 kompanııany satyp alyp, bógde adamdarǵa qaıta tirkegen.
- Osyndaı JShS-niń altaýy eshqandaı aktıvteri bolmaı, jalpy quny 1,2 mıllıard teńge bolatyn tender arqyly 56 memlekettik tapsyrysqa ıe bolǵan. Tapsyrys berýshi kórsetilgen 8 kompanııanyń sońǵy 5 jylda bar bolǵany 14 mıllıon teńge salyq tólegenine nazar aýdarmaǵan. Budan bólek, Pavlodar qalasynyń turǵyny bes turǵyn úıdi abattandyrýǵa jáne sport nysanyn salýǵa bólingen 102 mıllıon teńgeden astam qarajat urlady degen kúdikpen qamaýda otyr. Qylmystyq is sotqa joldandy,-dep málim etti Arman Júnisov.
Ábilqaıyr Sqaqov búginde Pavlodar oblysynyń qurylys salasynda birqatar máseleler, sonyń ishinde sapasyz tehnıkalyq tapsyrmalarǵa baılanysty túıtkilder bar ekenin aıtty.
- Kóleńkeli ekonomıkaǵa keletin bolsaq, búginde qarjy aǵyndarynyń 30% - ǵa jýyǵy jasyryn qalyp otyr. Respýblıkalyq deńgeıde kóleńkeli ekonomıkaǵa qarsy is-qımyl týraly zań jobasy ázirlenetin bolady. Bizge óńir ishinde qandaı salalar, qandaı bıýdjettik baǵdarlamalar ákimshileri jáne qandaı merdigerlik uıymdar osy táýekelge kóbirek ushyraıtyny jóninde óz taldaýymyzdy jasaýymyz qajet,- dedi ákim.
Óńir basshysy kóleńkeli ekonomıkanyń deńgeıi neǵurlym tómen bolsa, ınvestıtsııalyq tartymdylyq soǵurlym joǵary bolatynyn eske saldy.
- Sondyqtan salyq tóleýden jaltarýǵa, aqshany jylystatýǵa jáne sybaılas jemqorlyqqa qarsy kúres - ortaq mindet, -dep atap ótti Ábilqaıyr Sqaqov.