Qarjysy joq menıý: Astanada oqýshylar áli eski normamen tamaqtanyp júr
ASTANA. KAZINFORM — Astanada mektep ashanasyna tamaq jetkizýshiler jańa standarttar engizilgenine qaramastan balalardy eski mázir boıynsha tamaqtandyrýdy jalǵastyryp otyr.
Olardyń aıtýynsha, jańa ratsıondaǵy ónimderdiń sany men standarty aıtarlyqtaı ósken kezde tamaq quny ózgerissiz qaldy.
Búgin Astana qalasy Kásipkerler palatasy janyndaǵy Kásipkerler quqyǵyn qorǵaý jáne sybaılas jemqorlyqqa qarsy is-qımyl jónindegi keńestiń otyrysynda oqýshylardy tamaqtandyrý boıynsha qyzmet kórsetý kelisimsharttaryn buzý jáne jetkizýshiler úshin qarjylyq táýekelder máselesi talqylanyp otyr.
— 2025 jyldyń 5 qyrkúıeginde Astana qalasy Bilim basqarmasynyń basshysy mektepterdiń jańa mázirge kóshýi týraly buıryqty bekitti. Bul rette tamaqtyń quny burynǵydaı qaldy. Mundaı jaǵdaıda sapa týraly aıtý múmkin emes, óıtkeni jetkizýshiler múmkin emes jaǵdaıǵa túsedi. As máziri ózgergen jaǵdaıda baǵanyń da ózgerýi tıis ekeni sózsiz. Óıtkeni jańa tamaqtaný standarttarynda et, sút, jemis jáne basqa da azyq-túlik boıynsha normalardyń aıtarlyqtaı ósýi qarastyrylǵan, — dedi Respýblıkalyq bólshek saýda jáne qoǵamdyq tamaqtaný qaýymdastyǵynyń vıtse-prezıdenti Marına Lapteva.
Onyń aıtýynsha, jańa as máziri shamamen 30%-ǵa qymbat, kem degende 1000 teńge turady. Osyǵan baılanysty jetkizýshiler quqyq qorǵaý organdaryna, sonyń ishinde olardyń ustanymyn qoldaǵan Astana qalasynyń prokýratýrasyna shaǵym túsirdi. Másele elordadaǵy 100-den astam mekteptegi 97 myń oqýshynyń tamaqtanýyna qatysty bolyp otyr.
Marına Lapteva sondaı-aq mekteptegi tamaqtanýdyń jańa standarty elimizdiń tórt aımaǵy: Astana, Soltústik Qazaqstan, Shyǵys Qazaqstan jáne Aqtóbede áli engizilmegenin habarlady.
— Bizdiń respýblıkalyq qaýymdastyq Qazaqstannyń toǵyz oblysyn biriktirip otyr, jáne el boıynsha jaǵdaı mynadaı: búginde mektepte tamaqtanýdyń jańa standarty tórt aımaq: Astana qalasy, Soltústik Qazaqstan, Shyǵys Qazaqstan jáne Aqtóbe oblystarynda engizilgen joq. Buǵan sebep — qajetti qarjylandyrýdyń joqtyǵy. Bul tek jergilikti ózin-ózi basqarý organdarynyń ǵana emes, sonymen qatar Bilim jáne Densaýlyq saqtaý mınıstrlikteriniń de problemasy dep oılaımyz, óıtkeni tamaqtanýdyń jańa standarty shyǵynǵa túsiretin normatıvtik akt jáne ony aımaqtarmen aldyn ala kelisý kerek edi.Oblystyq máslıhat depýtattary atap ótkendeı, jergilikti bılikke azyq-túlik ratsıonynyń ózgergeni týraly habarlanbaǵandyqtan esepteý júrgizilgen joq, jáne bıýdjet júktemege tótep bere almady, — dedi ol.
Elordadaǵy oqýshylardyń tamaqtanýyn qamtamasyz etetin «Sootechestvennıkı» JShS dırektory Anastasııa Zaharchenkova jetkizýshiler mektepte tapsyrys berýshilermen qosymsha kelisimderge qol qoımaǵanyn rastady, buǵan jańa sharttarda qarjylandyrýdyń ulǵaıýy qarastyrylmaǵany sebep boldy.
— 2025 jyldyń qyrkúıeginde et, kókónis, sút jáne jemis-jıdek normalaryn arttyratyn jańa taǵamdyq standart engizildi. Alaıda tamaqtaný quny 2024 jyly sııaqty QQS-syz 714 teńge deńgeıinde qaldy. Bir ǵana azyq-túlik jıyntyǵynyń quny qazir shamamen 700 teńgeni quraıdy, al óndiris shyǵyndary múlde esepke alynbaǵan. Sondyqtan Astana mektepterinde tamaqtandyrý burynǵydaı 2025 jyldyń basynda memlekettik satyp alý aıasynda bekitilgen eski mázir boıynsha júzege asyrylyp otyr, — dedi ol.
Óz kezeginde Astana qalalyq Bilim basqarmasynyń kámeletke tolmaǵandardyń quqyqtaryn qorǵaý basqarmasynyń basshysy Dıana Amangeldiqyzy basqarma tek zań aıasynda jumys isteıtinin basa aıtty.
— Jańa standart qabyldandy, as mázirin Qoǵamdyq densaýlyq saqtaý basqarmasy bekitip jatyr. Biz zań talaptaryn oryndaýǵa mindettimiz — ol keńes berý sıpatynda emes. Osyǵan baılanysty tamaqtaný qunyn qarjylandyrýdy esepteıtin komıssııa quryldy. Zańǵa sáıkes, baǵa Ulttyq statıstıka bıýrosynyń málimetteri negizinde anyqtalady. Sondyqtan óndiris shyǵyndary qarastyrylmaǵan degen málimdeme durys emes — komıssııa bul shyǵyndarǵa shamamen 40% belgiledi, — dep túsindirdi ol.
Eske sala keteıik, buǵan deıin mektepte tamaqtandyrýdyń jańa standarty bekitilgenin jazǵan edik.