Qarjylyq saýattylyqty neden bastaý kerek — mentor keńesi

ASTANA. KAZINFORM — Mentordyń málimdeýinshe, jeke shyǵynyn eseptep júretin adam qaryzǵa urynbaıdy.

— Qarjylyq saýattylyqty — otbasydan bastaý kerek. Ol kúndelikti tirshiliktegi azyq-túlik, kommýnaldyq, kıim-keshek, baılanys taǵy basqa otbasylyq shyǵyndardy basqarýdan bastaǵan jón. Óz shyǵynyn eseptep júretin adam qaryzǵa urynbaıdy. Keıbir qarjylyq saýattylyǵyn arttyrýǵa kelgen azamattar aıtyp jatady, aılyǵymyz joǵary bolsa, qaryzǵa kirmes edik deıdi. Al endi shyǵyndaryn eseptep, taldaǵanda qajetti shyǵynnyń kóbi baıqalady, — dedi «Qaryzsyz qoǵam» jobasynyń Astana qalasy boıynsha mentory Dýlat Myńbaev Astana qalasynyń kommýnıkatsııalar qyzmeti alańynda ótken baspasóz máslıhatynda.

Sondaı-aq halyq arasynda qarjylyq saýattylyq kýrsyn ótkizip júrgen mentor otbasylyq shyǵyn máselesi boıynsha naqty mysal keltirdi. 

— 2023 jyly «Qaryzsyz qoǵam» jobasy bastalǵanda men Túrkistan oblysynda bolyp, qarjylyq saýattylyq boıynsha dárister ótkizdim. Sabaqta otbasylyq shyǵyndardy jazyp bastaǵanda birinshi kezekte toı-dýman tur, ıaǵnı azamattar toı-tomalaq dep kórsetken. Al soltústik óńirlerde shyǵyn kóbine azyq-túlik, kommýnaldyq tólem taǵy sol sııaqty. Sondyqtan artyq shyǵyndy qysqartyp, ár shyǵyndy basqara bilgen abzal, — degen keńes berdi maman.

Aıta ketsek, búginde 1,6 mıllıonnan asa qazaqstandyq 90 kúnnen asqan nesıesin óteı almaı júr.

Eske salaıyq, Memleket basshysy bıyl Joldaýynda halyqtyń qarjylyq saýatyn arttyrý jáne qaryz júktemesin tómendetý máselesine aıryqsha toqtaldy jáne «Qaryzsyz qoǵam» jobasyn jalǵastyrýdyń mańyzyn atap ótti. 

Osy oraıda elimizde mektep qabyrǵasynan bastap qarjylyq saýattylyqty arttyrý ıdeıasy alǵa tartyldy.