Qarjylyq monıtorıng agenttigi jyl basynan beri 36 qarjy pıramıdasynyń qyzmetin toqtatty

ASTANA. KAZINFORM –  Qarjylyq monıtorıng agenttigi qarjy pıramıdalarynyń qyzmetin anyqtaý jáne toqtatý boıynsha júıeli jumysyn jalǵastyryp keledi. 

Agenttiktiń málimetinshe,  jyl basynan beri jalǵan ınvestıtsııalyq jobalar týraly aqparat taratqan 7 myńnan astam ınternet-saıt buǵattalǵan. 

• Jalpy aýdıtorııasy 276 myń adam bolatyn Instagra jáne Telegram jelilerindegi 43 zańsyz chat jabyldy;
• 86 myńnan astam azamatty tartqan 36 qarjy pıramıdasynyń qyzmeti toqtatyldy;
• 19 qarjy pıramıdasyna qatysty 46 sotqa deıingi tergeý aıaqtaldy;
• 12,5 mlrd teńge somasyna múlikke tyıym salý arqyly keltirilgen shyǵyndy óteý qamtamasyz etildi.

Aıta ketý kerek, 2021 jyldan beri 100-den astam qarjy pıramıdasynyń qyzmeti toqtatylǵan. 227 uıymdastyrýshy naqty merzimge bas bostandyǵynan aıyryldy.

Agenttikte qarjy pıramıdalarynyń belgilerin tekserýge múmkindik beretin «Baiqa, piramida!» Telegram-boty iske qosýly. 

Eske sala keteıik, jaqynda Májilis Qarjylyq monıtorıng agenttiginiń ókiletin keńeıtetin zań jobasyn maquldady.