Qarjylyq monıtorıng agenttigi Rýslan Satyvaldeevke qatysty isti tergeýdi aıaqtady

ASTANA. KAZINFORM – Sot saraptamalary ortalyǵynyń basshysy Rýslan Satyvaldeevke qatysty isti tergeý aıaqtaldy. Bul týraly QR Qarjylyq monıtorıng agenttigi tóraǵasynyń orynbasary Jeńis Elemesov aıtty.

Onyń aıtýynsha, qazir is materıaldarymen tanysý rásimi júrip jatyr.

- Іs boıynsha tergeý aıaqtaldy. Qazir tanystyrý protsesi júrip jatyr. Ony aıaqtaǵannan keıin sotqa joldaımyz, - dedi J. Elemesov Parlament Májilisinde tilshiler suraǵyna jaýap bere otyryp.

Aıta keteıik, Rýslan Satyvaldeevtiń ustalǵandyǵy týraly aqpan aıynda málim boldy. Bul rette ol bıýdjet qarajatyn jymqyrý kúdigine ilikken edi.

Osyǵan deıin Májilis Qarjylyq monıtorıng agenttiginiń ókiletin keńeıtetin zań jobasyn maquldaǵany týraly jazdyq.