Qarjylyq monıtorıng agenttigi PIN-UP isi boıynsha eki shetel azamatyna izdeý jarııalady
ASTANA. KAZINFORM – Sottyń sanktsııasymen atalǵan tulǵalarǵa qatysty syrttaı «qamaýda ustaý» túrindegi bultartpaý sharasy qoldanyldy.
Qarjylyq monıtorıng agenttigi Dmıtry Drýjınsky, 1970 jylǵy 27 maýsymda týǵan, Amerıka Qurama Shtattarynyń azamaty Marına Levkovıch (Gınzbýrg), 1985 jylǵy 8 qarashada týǵan, Ýkraına azamatyn izdeýge jarııalady.
Sottyń sanktsııasymen atalǵan tulǵalarǵa qatysty syrttaı «qamaýda ustaý» túrindegi bultartpaý sharasy qoldanyldy.
Olar Qazaqstan Respýblıkasynyń aýmaǵynda zańsyz oıyn bıznesin uıymdastyrdy degen kúdikke ilindi.
Tergeý barysynda «PIN-UP» jáne «PINCO» brendterimen jumys istegen onlaın-kazıno qyzmetin shetelden áreket etken, baılanysy bar kompanııalar jelisi arqyly uıymdastyrǵan adamdar toby basqarǵany anyqtaldy.
— D. Drýjınsky men M.Levkovıch koordınatorlyq fýnktsııalardy atqaryp, sybaılastardy irikteýmen, tólem uıymdary men ekinshi deńgeıli bankter ókilderimen ózara árekettesýmen, sondaı-aq aqsha qabyldaý men shyǵarý protsesin qamtamasyz etken tólem ınfraqurylymyn qurý jáne onyń jumys isteýine qatysqan, — delingen habarlamada.
Zańsyz qyzmetti búrkemeleý maqsatynda «PIN-UP.KZ» brendimen býkmekerlik qyzmetti júzege asyrýǵa memlekettik lıtsenzııa alǵan «Bonamı» JShS zańdy tulǵasy qurylǵan.
Qarjylyq súıemeldeý úshin onlaın-kazınonyń tólem agregatorlary fýnktsııalaryn atqarǵan «Gold Pay» JShS jáne «Cyber Pay» JShS (keıinnen — «Pinnacle Financial Solutions» JShS) qosa alǵanda, tólem uıymdarynyń jelisi tirkeldi.
Onlaın-kazıno klıentterinen túsken qarajat tranzıttik shottarda jınaqtalyp, keıin elektrondyq aqsha operatsııalaryna lıtsenzııasy bar baılanysy kompanııalar arqyly krıptovalıýtaǵa aıyrbastalǵan.
— Eger izdeýde júrgen tulǵalardyń ornalasqan jeri týraly qandaı da bir aqparat belgili bolsa, Qazaqstan Respýblıkasynyń Qarjylyq monıtorıng agenttigine tómendegi telefondar arqyly habarlaýyńyzdy suraımyz: +7 7172 70 84 78 — kezekshi bólim, — delingen QMA habarlamasynda.
Aıta ketelik OrdaMed kompanııasynyń basshysyna izdeý jarııalanǵan edi.