Qarjylyq monıtorıng agenttigi bloger Mellstroy-ǵa qatysty tergeýdi bastady
ASTANA. KAZINFORM — Belarýs azamaty Andreı Býrımge halyqaralyq izdeý jarııalandy. Sot blogerge qatysty «qamaýda ustaý» túrindegi bultartpaý sharasyn sanktsııalady, dep habarlaıdy vedomstvonyń baspasóz qyzmeti.
Ol áleýmettik jeliler arqyly Qazaqstan paıdalanýshylaryn da nysanaǵa alǵan onlaın-kazıno «Mellstroy.game» platformasyn zańsyz ilgeriletý maqsatynda aýqymdy jarnamalyq naýqan uıymdastyrdy degen kúdikke ilinip otyr.
— BAQ tarapynan kelip túsken saýaldarǵa oraı habarlaımyz, Astana qalasy boıynsha QMA departamenti Belarýs Respýblıkasynyń azamaty, «Mellstroy» laqap atymen tanymal bloger Andreı Aleksandrovıch Býrımdi (15.12.1988 j. t.) halyqaralyq izdeýge jarııalady. Sot Býrımǵa qatysty «qamaýda ustaý» túrindegi bultartpaý sharasyn sanktsııalady. Ol áleýmettik jeliler arqyly Qazaqstan paıdalanýshylaryn da nysanaǵa alǵan onlaın-kazıno «Mellstroy.game» platformasyn zańsyz ilgeriletý maqsatynda aýqymdy jarnamalyq naýqan uıymdastyrdy degen kúdikke ilindi. Onlaın-kazınony jarnamalaý úshin bloger ártúrli utys oıyndary men chellendjderdi jarııalaǵan. Qatysýshylarǵa TikTok, YouTube Shorts jáne basqa da áleýmettik jelilerde Mellstroy.game ataýyn, kazıno logotıpterin jáne saıt siltemelerin kórsetetin vıdeolar túsirý usynylǵan, — delingen habarlamada.
Buǵan deıin Býrım Reseı Federatsııasynda tikeleı efır kezinde adamdy uryp-soqqany úshin jaýapkershilikke tartylǵan. Sonymen qatar, 2025 jyldyń qarasha aıynda Belarýs Respýblıkasynyń Mınsk qalalyq soty blogerdiń barlyq platformalardaǵy arnalary men onyń logotıpterin ekstremıstik materıaldar dep tanydy.
— Eger izdeýdegi tulǵalardyń ornalasqan jeri týraly qandaı da bir aqparat bilseńiz, Astana qalasy boıynsha ETTD-ge kelesi telefondar arqyly habarlasýyńyzdy suraımyz: +7 7172 70 84 78 — kezekshi bólim; +7 7172 70 84 79. Qupııalylyq pen syıaqyǵa kepildik beriledi. Qazaqstan Respýblıkasynyń zańnamasynda qumar oıyndardy jarnamalaǵany úshin ákimshilik jaýapkershilikpen qatar, zańsyz oıyn bıznesine sybaılas bolý jáne járdemdesý faktileri úshin qylmystyq jaýapkershilik te kózdelgenin atap ótemiz, — dep atap ótti vedomstvo.
Osyǵan baılanysty Qarjylyq monıtorıng agenttigi azamattardy zańsyz oıyn bıznesin kez kelgen túrde jarnamalaýǵa nemese ony ilgeriletýge qatysýdyń jol berilmeıtini týraly eskertedi.
Eske salsaq, keshe Qazaqstanda bloger Mellstroy-ǵa izdeý jarııalanǵany belgili boldy.