Qarjylyq monıtorıng agenttigi Qostanaı oblysynda zańsyz maınerler qyzmetiniń jolyn kesti
RÝDNYI. KAZINFORM - Rýdnyı qalasynyń aýmaǵynda birqatar adam tıisti lıtsenzııasyz zańsyz maınıngpen «Bitcoin» qamtamasyz etilmegen tsıfrlyq aktıvin (krıptovalıýta) óndirýmen aınalysqany anyqtaldy.
Zańsyz «maınerler» 3 aýdan ortalyǵy nemese 27 orta mektep nemese 13 aýrýhana tutynatyndaı elektr energııa kólemin paıdalanǵan, bul jergilikti elektr jelilerine orasan zor salmaq túsirgen. Tintý nátıjesinde 150-ge jýyq maınıngke arnalǵan apparattyq-baǵdarlamalyq keshen (ASIC), olardy salqyndatýǵa arnalǵan qurylǵylar, Wi-Fi roýterler, uıaly telefondar men noýtbýkter tárkilendi. Agenttiktiń tsıfrlyq aktıvtermen aınalysatyn arnaıy bólimshesi zańsyz óndirilgen «Bitcoin» túsken krıptobırjadaǵy akkaýntardy anyqtady.
Aldyn ala esep boıynsha zańsyz qyzmetten túsken qarjynyń jalpy aınalymy 100 mln teńgeden asady.
Sottyń sanktsııasymen kúdiktiniń múlkine jánekrıptovalıýta akkaýntynda saqtalǵan zańsyz óndirilgen tsıfrlyq aktıvterine tyıym salyndy.
Memleket basshysy óz Joldaýynda tsıfrlyq aktıvter men maınıngti zańmen rettep, krıptobırjalardy odan ári damytý isin jalǵastyrý qajettigin atap ótken bolatyn.
Aıta ketsek, Qarjylyq monıtorıng agenttiginiń isteri boıynsha 2024 jyly tsıfrlyq aktıvterdiń zańsyz aınalymy salasynda 7 úkim shyǵaryldy, olar boıynsha sotqa deıingi tergep-tekserý barysynda qylmystyq jolmen alynǵan quny 1.2 mlrd teńgeden asatyn múlikke tyıym salyndy.
Eske sala keteıik, «Qazaqstan Respýblıkasynyń tsıfrlyq aktıvter týraly» Zańyna sáıkes QR aýmaǵynda tsıfrlyq maınıng qyzmeti lıtsenzııalaýǵa jatatynyn, qamtamasyz etilmegen tsıfrlyq aktıvterdi shyǵarý jáne onyń aınalymy, sondaı-aq osyǵan uqsas bırjalar qyzmeti «Astana» Halyqaralyq qarjy ortalyǵy aýmaǵynda ǵana júzege asyrylylady.
