Qarjylyq monıtorıng agenttigi Bıshimbaevtyń týystaryna tıesili aktıvteri tekserýge daıyn

ASTANA. KAZINFORM – QR Qarjylyq monıtorıng agenttigi Qýandyq Bıshimbaevtyń otbasy men týystarynyń aktıvteri qanshalyq zańdy ekenin tekserýge daıyn. Bul týraly atalǵan vedomstvo tóraǵasynyń orynbasary Jeńis Elemesov aıtty.

Búgin Parlament Májilisinde bolǵan baspasóz máslıhatynda tilshiler Q.Bıshimbaevtyń jaqyn týystaryna tıesili aktıvterdiń zańdylyǵyn tekserý boıynsha petıtsııa aıasynda tıisti tekserý júrgizý múmkindigi týraly suraq qoıdy.

Bul turǵyda Jeńis Elemesov aktıvterdiń zańdylyǵyna qatysty tekserýler elimizde turaqty túrde iske asyrylyp jatqanyn aıtty.

«Qazir bizde tirkelgen qylmystyq is joq. Biraq biz zańsyz jolmen alynǵan qylmystyq kiristerge qatysty jalpy negizde turaqty tekserý júrgizemiz. Eger qylmystyq jolmen alynyp, zańdastyrylǵan zańsyz kirister bolsa, mindetti túrde jaýapqa tartamyz. Petıtsııaǵa qatysty toqtalsaq, petıtsııanyń nátıjesin kúteıik. Bul másele boıynsha zerttep, buǵan mindetti túrde nazar aýdaramyz», - dedi agenttik tóraǵasynyń orynbasary.

Buǵan deıin BAQ-ta Q.Bıshimbaevtyń otbasy men jaqyn týystarynyń kirisin tekserý jónindegi petıtsııa bastalǵany týraly habarlanǵan edi.

Eske salsaq, bıyl mamyr aıynda sýdıa Aıjan Qulbaeva Qýandyq Bıshimbaev pen Baqytjan Baıjanovqa qatysty Alqabılerdiń úkimin oqydy.

Qylmystyq kodekstiń 110-baby 2-bóligi 1-tarmaǵynda, 99-bóliginiń 1-tarmaǵynda kózdelgen qylmystyq quqyq buzýshylyqtardy jasaǵany úshin kináli dep tanylyp, QK-niń 110-babynyń 2-bóliginiń 1-tarmaǵymen 7 jylǵa bas bostandyǵynan aıyryldy. Qylmystyq kodekstiń 99-babynyń 2-bóliginiń 5-tarmaǵy boıynsha – 20 jylǵa bas bostandyǵynan aıyryldy. Qylmystyq kodekstiń 58-babynyń 4-bóligine sáıkes, qylmystardyń jıyntyǵy boıynsha jazalardy ishinara qosý arqyly Bıshimbaev 24 jylǵa bas bostandyǵynan aıyryldy.

Sonymen qatar, Alqabıler Baqytjan Baıjanovty aǵasy Qýandyq Bıshimbaevtyń qylmysyn jasyrǵany úshin kináli dep tapty. Sóıtip sot Baıjanovty 4 jylǵa bas bostandyǵynan aıyrdy.