Qarjylyq monıtorıng agenttigi alaıaqtyqtyń jańa túri týraly eskertti
ASTANA. KAZINFORM – Qarjylyq monıtorıng agenttigi (QMA) azamattardy alaıaqtardyń jańa aıla-tásilderinen saq bolýǵa shaqyrdy.
Agenttiktiń málimetinshe, alaıaqtar orta jáne joǵary oqý oryndarynda, sondaı-aq memlekettik mekemelerde tekseris júrgizilip jatqany týraly jalǵan habarlamalar taratady. Olar senim uıalatý úshin QMA-nyń jalǵan logotıpteri men mórleri bar blankilerdi paıdalanyp, qujattar usynýdy nemese «yntymaqtastyqqa» shaqyrýdy talap etedi.
Keıin ózderin agenttik qyzmetkeri retinde tanystyryp, azamattarǵa habarlasyp, bank shottary týraly málimetterdi aldap alýǵa tyrysady. Sonymen qatar jalǵan QMA ókilderi messendjerler arqyly «tekserilip jatqan tulǵalar tizimine engizilgensiz» dep habarlap, aqsha bopsalaý jaǵdaılary da tirkelgen.
Azamattardyń shaǵymdarynda jıi qaıtalanatyn tekter: «Myqtybaev», «Hamzın», «Jalymov», «Jalymbetov».
Qarjylyq monıtorıng agenttigi resmı túrde habarlaıdy:
– mundaı tekserister júrgizbeıdi;
– resmı habarlama jibermeı, telefon arqyly jeke derekterdi suramaıdy;
– jeke tulǵalarǵa qońyraý shalmaıdy;
– aqsha aýdarýdy talap etpeıdi;
– tek zań aıasynda áreket etedi.
Agenttik azamattardy saq bolýǵa, arandatýshylyq pen alaıaqtardyń aılasyn elemeýge shaqyrdy.
Kúmán týǵan jaǵdaıda 1458 nómirli Call-ortalyǵyna nemese +7 (727) 279-20-86 nómiri boıynsha kezekshi bólimge habarlasý qajet.
Aıta keteıik, Pavlodarda prokýratýra qyzmetkerine qatysty alaıaqtyq faktisi boıynsha tergeý júrip jatyr.