Qarjylyq monıtorıng agenttigi 150 myńǵa jýyq aktsızsiz temeki satýshylardy quryqtady

ASTANA. KAZINFORM – Qarjy monıtorıngi agenttiginiń qyzmetkerleri kontrofaktili temeki ónimderin taýyp, tárkilegen. Jalpy, mamandar Qaraǵandy jáne Aqtóbe oblystaryndaǵy eki kásipkerden aktsızsiz 150 myńǵa jýyq temeki tárkiledi, dep habarlaıdy Kazinform agenttiginiń tilshisi. 

Qaraǵandy oblysynda qarjy monıtorınginiń qyzmetkerleri esepke alý-baqylaý markalarynsyz temeki ónimderin satqan zańsyz áreketin áshkereledi.

«Agenttik qoıma úı-jaıyn tintý barysynda 71 myńnan astam qorap temeki taýyp, olardy tárkiledi. Tárkilengen temeki ónimderiniń jalpy quny 18,5 mln teńgeni qurady. Kontrafaktilik temeki ónimderi joıyldy», - dep habarlady QR QMA baspasóz qyzmeti.

Budan basqa, Aqtóbe oblysy boıynsha QMA departamenti zańsyz kásipkerlik qyzmetti júzege asyrý faktisi boıynsha Qyrǵyz Respýblıkasynyń azamatyna qatysty sotqa deıingi tergeý júrgizip jatyr. QMA habarlaǵandaı, «Jaısan-avto» avtomobıl-ótkizý beketinde Qazaqstan Respýblıkasynan taýar shyǵarý kezinde júk kóliginiń júrgizýshisi ustaldy. 

«Júk kóliginiń shanaǵyn tekserý kezinde kókónisterde (pekın qyryqqabaty) jasyrylǵan aktsızdik markalary joq, jalpy sany 70 myńnan astam qorap temeki ónimderi tabyldy. Memlekettik kirister organdarynyń derekterine sáıkes tóleýge jatatyn aktsızdik alym somasy 22,6 mln teńgeni quraıdy. ​Qazirgi ýaqytta tergeý amaldary júrgizilýde», - dep túsindirdi QR QM.

Júk kóligi arnaıy turaqqa qoıyldy jáne ondaǵy temeki ónimderi tárkilenetin bolady. 

Jalpy, 2024 jyldyń basynan QMA óndirisinde temeki ónimderiniń aınalymyna baılanysty 62 qylmystyq is tirkeldi, onyń 35-i sotqa joldandy. Barlyǵy 11 mlrd teńgeden astam somaǵa 22 mln qorap temeki tárkilendi. 

Qarjy monıtorıngi agenttigi aktsızdeletin temeki buıymdaryn aktsızdik markalarsyz iri mólsherde ótkizý qylmystyq jaýaptylyqqa ákep soǵatynyn eskertedi (QR QK 214-baby).