Qarjylyq qaýipsizdik olımpıadasynyń fınalısteri anyqtaldy

ASTANA. KAZINFORM — Qazaqstanda Qarjylyq monıtorıng agenttigi uıymdastyrǵan Qarjylyq qaýipsizdik boıynsha ulttyq olımpıadanyń fınaly ótti. Bıyl «Zań men Tártip» qaǵıdaty aıasynda ótken bilim saıysy eldiń túkpir-túkpirinen 5 887 stýdentti biriktirip, olardyń qarjylyq saýattylyǵy men quqyqtyq mádenıetin arttyrýǵa baǵyttaldy. Nátıjesinde 40 úzdik qatysýshy fınalda baq synap, 10 jeńimpaz halyqaralyq deńgeıde Qazaqstan namysyn qorǵaıtyn boldy.

Olımpıadanyń basty maqsaty – stýdentterdiń qarjylyq qaýipsizdik, kóleńkeli ekonomıka men qarjylyq quqyqbuzýshylyqtarǵa qarsy is-qımyl salasyndaǵy tájirıbelik bilimin arttyrý, sondaı-aq olardyń analıtıkalyq oılaý qabileti men kásibı jaýapkershiligin damytý.

– Bıyl «Zań men Tártip» narratıvi aıasynda ótken ulttyq olımpıadaǵa 2–3 kýrs stýdentteri men 1 kýrs magıstranttaryn qosa alǵanda 5 887 adam qatysty. 2026 jylǵy 27 sáýirde elimizdiń jetekshi joǵary oqý oryndarynyń 40 úzdik stýdenti qatysqan olımpıadanyń fınaly ótti, – dep habarlady agenttikten.

Nátıjesinde Qazaqstandy Reseı Federatsııasynda ótetin Qarjylyq qaýipsizdik boıynsha halyqaralyq olımpıadada tanystyratyn 10 jeńimpaz anyqtaldy. Jeńimpazdar tizimi Agenttiktiń resmı saıtynda jarııalandy.

Olımpıada Maqsut Narikbayev University, Halyk Bank jáne EQYU-nyń Astanadaǵy Baǵdarlamalar ofısiniń qoldaýymen ótti.