Qarjylandyrýdyń qysqarýyna baılanysty 278 mıllıon bala oqýǵa bara almaıdy – BUU

ASTANA. KAZINFORM - Birikken Ulttar Uıymy Balalar qorynyń (UNICEF) málimeti boıynsha, jahandyq bilim berýdi qarjylandyrý kúrt azaıyp keledi, ıaǵnı 2026 jylǵa qaraı taǵy 6 mıllıonǵa jýyq bala mektepke barmaýy múmkin. 

Boljam boıynsha, tabysy joǵary elderdiń bilim salasyna bóletin resmı kómegi 3,2 mıllıard dollarǵa azaıady. Bul 2023 jylmen salystyrǵanda 24 paıyzǵa kem. Qysqartýdyń 80 paıyzǵa jýyǵy úsh donor elge tıesili.

Qysqartý mektepke barmaıtyn balalardyń sanyn 272 mıllıonnan 278 mıllıonǵa deıin arttyrady. Bul Germanııa men Italııadaǵy barlyq bastaýysh mekteptiń jabylýymen birdeı bolady.

Eń úlken shyǵyn bilim berý júıesi álsiz aımaqtarda bolady dep boljanyp otyr. Basty soqqy bastaýysh bilimge tıedi: oǵan kómek úshten birine qysqarýy múmkin. UNICEF baǵalaýy boıynsha, bul jahandyq bilim daǵdarysyn tereńdetip, mektepke barmaıtyn balalar úshin bolashaqta eńbek naryǵynda problemalar týǵyzady.

Qarjylandyrýdy qysqartý tek synyptarǵa ǵana emes, sonymen qatar kóptegen balany tamaqtandyrýdyń jalǵyz turaqty kózi bolyp tabylatyn mekteptegi tamaqtandyrý baǵdarlamalaryna da qaýip tóndiredi.

UNICEF donorlardy bilimge kómektiń kem degende jartysyn nashar damyǵan elderge baǵyttaýǵa, gýmanıtarlyq baǵdarlamalardy qarjylandyrýdy saqtap qalýǵa, sondaı-aq erte jastaǵy jáne bastaýysh bilimge basymdyq berýge shaqyrady.

Eske sala keteıik, bıylǵy oqý jylynda Gazada 660 000 bala mektepten tysqary qaldy.