Qarjylandyrý qıyldy ma: Almatyda áıelderdiń hokkeı klýby tóńireginde daý týyndady

Klýb kapıtany Madına Tursynova Almaty ákiminiń atyna beıneúndeý jasady. Onyń aıtýynsha, halyqaralyq deńgeıde kóptegen jetistikteri bar «Aısulý» klýby bıyl memlekettik qarjylandyrýdan tolyqtaı qaǵylǵan. Sondaı-aq ol qalalyq sport basqarmasy komandany «Olımpık» muz aıdynyndaǵy bólmesinen shyǵaryp jiberýge tyrysyp jatqanyn aıtty.

— Bireýler úshin bul jaı ǵana qabyrǵa nemese jertóledegi jaı ǵana bólme bolyp kórinýi múmkin, al biz úshin bul — ómirimizdiń úlken bir bóligi ótken, komandalyq rýhymyz shyńdalyp, jeńisterimiz shyńdalǵan shynaıy qara shańyraǵymyz. Bizge Almatyda jańadan ashylyp jatqan klýbqa aýysý usynyldy. Komandamyzdaǵy barlyq qyzdardyń atynan aıtarym: biz oǵan aýysqymyz kelmeıdi, óıtkeni ol jerde «Aısulý» bizge jyldar boıy berip kelgen bolashaq pen múmkindikter joq, — dep jazdy Madına Tursynova.

Atalǵan jazbaǵa jáne «Aısulý» klýb tóńireginde týyndaǵan daýǵa qatysty Almaty qalasynyń sport basqarmasy túsinikteme berdi. Vedomstvo jaýabyna sáıkes, «Aısulý» áıelder hokkeı klýby — jekemenshik kásibı klýb. Kásibı sport klýbtaryn qarjylandyrý QR qoldanystaǵy zańnamasyna sáıkes tek konkýrstyq negizde júzege asyrylady. Bıyl memlekettik satyp alý qorytyndysy boıynsha bıýdjettik qarjylandyrýǵa ózge klýb ıe bolǵan.

Sonymen qatar vedomstvo «Almaty qalasynyń sport ǵımarattary dırektsııasy» JShS usynǵan aqparatqa sáıkes, «Aısulý» áıelder hokkeı klýby» JShS-niń Balýan Sholaq atyndaǵy sport saraıy men Ortalyq stadıon nysandaryn paıdalaný boıynsha 38 mıllıon teńge bereshegi bar ekenin atap ótti. Biraq sport basqarmasy klýbty Olympic Arena muz saraıynan shyǵarý áreketi bolmaǵanyn jáne bul aqparat shyndyqqa janaspaıtynyn málimdedi.

— Jalǵan málimetterdi taratqany úshin Qazaqstan Respýblıkasynyń zańnamasynda ákimshilik jáne qylmystyq jaýapkershilik qarastyrylǵan. Shyndyqqy janaspaıtyn aqparat ári qaraı taratylǵan jaǵdaıda Almaty qalasynyń Sport basqarmasy quzyretti organdarǵa tıisti aryzben júginý quqyǵyn ózine qaldyrady, — dep habarlady basqarmadan.

Eske salaıyq, buǵan deıin Almatyda erekshe balalarǵa arnalǵan «Pıoner» kýrortynyń tóńireginde daý týyndady.