Qarjy jetispeı, qurylys toqtaǵan: Talǵardaǵy strategııalyq nysan 4 jyldan beri aıaqtalmaǵan
ASTANA.KAZINFORM — Talǵar qalasynda 4 jyldan beri salynyp jatqan magıstraldyq sý taratqyshtyń qurylysy toqtap tur.
Osyǵan baılanysty Májilis depýtattary Maksım Rojın men Danııar Qasqaraýov qalaǵa arnaıy baryp, máseleniń mán-jaıyn bildi.
Magıstraldyq sý taratqysh jobasy Talǵar qalasyna sý jetkizetin negizgi júıe bolýǵa tıis. Ol iske qosylǵannan keıin eski qubyrlar men tozǵan ınfraqurylymǵa túsetin júkteme azaıyp, qala turaqty ári jetkilikti kólemde aýyzsýmen qamtylýy kerek bolatyn. Alaıda qurylys áli aıaqtalmaǵandyqtan, qala áli de eski sý jelisine táýeldi bolyp otyr.
Maksım Rojınniń aıtýynsha, jańa sý taratqyshtyń qurylysy tórt jyl buryn bastalǵanymen, tolyq qarjylandyrýdyń joqtyǵynan belgilengen merzimde aıaqtalmaı otyr.
— Qazirgi tańda Talǵar qalasynda bar bolǵany 4300 tekshe metrlik rezervýarlyq qýat jumys istep tur. Bul, ásirese jaz mezgilinde, qala úshin jetkiliksiz. Al jańa júıe tolyq iske qosylǵan kezde qosymsha 7600 tekshe metrge deıin sý jetkizýge múmkindik bar. Joba aıasynda tórt rezervýar salynǵanymen, sý sapasyn baqylaýǵa arnalǵan zerthananyń qurylysy da jarty jolda toqtap qalǵan. Onyń ishindegi negizgi jabdyqtar áli ornatylmaǵan, sebebi qarjy bólinbegen, — deıdi depýtat.
50 myńǵa jýyq turǵyndy aýyzsýmen qamtıtyn jobanyń jalpy quny — 4,6 mlrd teńge. Qurylysty tolyq aıaqtaýǵa qajetti 1,7 mlrd teńgege jýyq qarjy áli bıýdjetten bólinbegen. Bul qarjyǵa sýdy hlorlaıtyn jabdyqtar, zerthanalyq quraldar jáne negizgi tehnologııalyq qurylǵylar alynýǵa tıis edi.
— Dál osy jabdyqtar ornatylmaıynsha nysandy paıdalanýǵa berý múmkin emes. Másele tek qurylys kóleminde emes, sýdyń sapasy men turǵyndardyń qaýipsizdigine tikeleı baılanysty. Nysandy 2026 jyldyń shilde aıynda aıaqtaý josparlanǵan. Alaıda ol úshin negizgi jabdyqtar men materıaldardy bıyl satyp alý qajet. Áıtpese, merdigerdiń aıtýynsha, jobanyń quny qymbattap, iske asyrý merzimi taǵy da sozylyp ketýi múmkin. Sondyqtan oblystyq bıýdjetten jetispeı turǵan qarajatty ýaqyt ozdyrmaı bólý máselesin kóterip otyrmyz, — dedi Maksım Rojın.
Qurylystyń aıaqtalmaýy qaladaǵy sý júıesine aıtarlyqtaı salmaq túsirip otyr. Jaz aılarynda sý qysymy tómendep, keı aýdandarda aýyzsý belgili bir ýaqytta ǵana beriledi.
Talǵar qalasynyń turǵyny Ahat Soltanqulov bul máseleniń jergilikti halyq úshin ózekti ekenin aıtady.
— Jazda jaǵdaı tipti qıyndaıdy. Ásirese 9 qabatty úılerdiń joǵarǵy jaǵyna sý múlde kóterilmeıdi, qysym joq. Sýǵa jarymaı qalatyn kúnder bolady. Keńdala men Aqdala aýylyndaǵy saıajaılardyń jaǵdaıy tipten qıyn. Qala kún saıyn ósip jatyr, al sý júıesi baıaǵy qalpy. Shynymyzdy aıtsaq, ábden sharshadyq. Endi osy sý taratqyshty tezirek bitirip, iske qossa eken dep kútemiz. Basqa úmit qalmady, — deıdi ol.
Májilis depýtattary magıstraldyq sý taratqyshty áleýmettik mańyzy bar strategııalyq joba retinde baqylaýda ustaıtynyn málimdedi.
Aıta ketelik Májilis depýtattary Astanadaǵy ardagerlerge arnalǵan ortalyq klınıkalyq gospıtal ujymymen kezdesken edi.