Qarjy jetkiliksizdigine baılanysty Pavlodar áýejaıyn jóndeý taǵy bir jylǵa uzardy

PAVLODAR. KAZINFORM – Áýejaıdaǵy jóndeý jumystary búginde 44%-ǵa ǵana oryndalǵan. Jóndeý jumystaryn aıaqtaý úshin taǵy 9,3 mlrd teńge qajet.

Pavlodar qalasyndaǵy áýejaıdy iske qosý taǵy bir jylǵa shegerildi. Merdiger kompanııa qarjy jetkiliksizdigine baılanysty nysandaǵy jóndeý jumystaryn aıaqtamaǵan.

– Áýejaıdaǵy jumystardy derine jetkizý úshin respýblıkalyq bıýdjetten qosymsha 9,3 mlrd teńge qajet. Qarajat bólý týraly usynystarymyz búginde qoldaý tapty. Al jumystar keler jyly jalǵasady. Qurylys-montajdaý jumystary shamamen 2026 jyldyń sáýirinde bastalýy kerek. Jaryq-sıgnaldy jabdyqtardy ornatýǵa, asfalt-betondy jabyndy tóseýge 4,5 aıdaı ýaqyt jumsalady. Rekonstrýktsııa jumystary shamamen keler jyldyń qyrkúıek aıynda aıaqtalady dep josparlanyp otyr, - dep habarlady óńirlik jolaýshylar kóligi jáne avtomobıl joldary basqarmasynan.

Basqarma málimetine súıensek, Pavlodar qalasynyń ushý-qoný jolaǵyn rekonstrýktsııalaýǵa 2024 jyly «Kyrylys Group RK» JShS-men jalpy somasy 16,4 mlrd teńgege kelisim jasalǵan.

Jobany ómirsheń etý maqsatynda sol jyly Ulttyq qordan 4,8 mlrd teńge, al byltyr respýblıkalyq jáne oblystyq bıýdjetterden 2,2 mlrd teńge qarajat bólingen. Qazirgi ýaqytta bıyl bólingen qarajattyń 76,5%-y ǵana ıgerilgen. Al jóndeý jumystary 44%-ǵa oryndalǵan.

– Jumys kestesine sáıkes, asfalt-beton jabynyn frezerleý, keńeıtý oryndarynda jol qabatynyń negizin salý, drenaj júıesin ornatý boıynsha jumystar oryndaldy. Qazirgi ýaqytta beınebaqylaý júıesin montajdaý jáne deformatsııalyq jikterdi ornatý arqyly perımetrlik qorshaý qurý boıynsha jumystar júrgizilip jatyr. Sondaı-aq shamamen 5 mlrd teńge somaǵa materıaldar men jabdyqtar satyp alyndy, - dep qosty basqarmadan.

Eske sala keteıik Pavlodar áýejaıy 1 sáýirden bastap jóndeýge jabylǵan.

Áýejaıdy jańartýǵa qarajat jetpeı jatqany týraly buǵan deıin de jazǵanbyz.