Qarjy pıramıdasynan zardap shekkender azaıar emes – senator
2023 jyldyń 9 aıynda qarjy pıramıdalarynan 2 myńnan astam adam zardap shekken. Bul týraly Senattyń jalpy otyrysynda depýtat Gennadıı Shıpovskıh aıtty, dep habarlaıdy Kazinform.
Depýtat eldegi qarjy pıramıdalaryna qatysty qylmys deńgeıi tómendep kele jatqanyn atap ótti. Alaıda soǵan qaramastan, zardap shekkenderdiń sany ósip barady.
«Bas prokýratýranyń dereginshe, «Qarjy pıramıdasyn qurý jáne oǵan basshylyq etý» boıynsha 2021 jyly 233 , 2022 jyly 104, al bıyl 9 aıda 89 is sotqa jiberilgen. Atalǵan statıstıkaǵa qarasaq, jyldan-jylǵa qarjylyq pıramıdanyń qurbandary azaıyp kele jatqan sekildi kórinýi múmkin. Al sol pıramıdalardan japa shekkenderdiń tizimine qaraıtyn bolsaq, kerisinshe statıstıkany baıqaımyz. Máselen, 2021 jyly zardap shekkender sany – 1259, 2022 jyly – 892, al bıylǵy toǵyz aıda 2079 adamdy qurap otyr. Atalǵan statıstıkada tek sot jábirlenýshi dep tanyǵan adamdardyń tizimi kórsetilgen», - dedi depýtat Qarjylyq monıtorıng agenttigine joldaǵan saýalynda.
Sonymen qatar senator óziniń atyna birneshe kooperatıvtiń 42 salymshysynan shaǵym kelip túskenin, onda azamattar kómek suraǵanyn atap ótti. Olar kooperatıvterge aqsha salǵan, biraq ýáde etilgen turǵyn úı de, aqshalary da qaıtarylmaǵan. Memlekettik «Boryshkerlerdiń biryńǵaı tiziliminiń» derekteri boıynsha mundaı kooperatıvter boıynsha sot sheshimi shyǵaryldy, biraq ol oryndalmaı keledi. 453 adam aqshasyn qaıtara almaı otyr. Jalpy shyǵyn quny 1 mlrd teńgeden asady.
«Qarjy pıramıdalaryna tosqaýyl qoıýǵa baǵyttalǵan qajet tetikterdiń bári bar, sondaı-aq Parlament jaǵynan zańnamalyq qoldaý jasalǵan. Dese de, qarjy pıramıdasy uıymdarynan zardap shekkenderdiń sany azaıar emes. Ne sebepti osy kúnge deıin qarjy pıramıdasy uıymdaryn jeńe almaı kelemiz?»,- dep surady senator.
