Qarjy pıramıdasyn qurǵan Oral qalasynyń eki turǵyny 5 jylǵa sottaldy
ORAL. KAZINFORM — Batys Qazaqstan oblysy boıynsha ekonomıkalyq tergep-tekserý departamenti Imrat Group qarjy pıramıdasynyń qyzmetin toqtatty.
Departamentten málim etkenindeı, tergeý barysynda Oral qalasynyń eki turǵyny aldyn ala sóz baılasý arqyly oblys aýmaǵynda 2024 jylǵy qazannan 2025 jylǵy maýsymǵa deıin Imrat Group qarjy pıramıdasynyń qurylymdyq bólimshesiniń qyzmetin uıymdastyrǵany anyqtaldy.
Kúdiktiler keńseler, áleýmettik jeliler, Telegram messendjeri arqyly belsendi úgit-nasıhat jumystaryn júrgizip, sondaı-aq azamattardy joǵary tabys ákeletin jobalarǵa aqsha qarajatyn salýǵa úgitteý maqsatynda tanystyrylymdar men konferentsııalar ótkizgen.
Qyzmetke zańdy sıpat berý maqsatynda keńse úı-jaılary jalǵa alynyp, jarnamalyq materıaldar daıyndalǵan jáne buqaralyq is-sharalar uıymdastyrylǵan.
Tergeý barysynda Imrat Group qyzmetiniń qarjy pıramıdasy qaǵıdaty boıynsha qurylǵany anyqtaldy. ıAǵnı, bir qatysýshyǵa syıaqy tóleý naqty kásipkerlik qyzmet júrgizbesten, tek jańa qatysýshylardyń salymy esebinen júzege asyrylǵan.
Tergeý málimetterine sáıkes, zańsyz shemaǵa ondaǵan azamat tartylǵan. Salymshylardyń basym bóligi zeınetkerler men 25 jasqa deıingi jastar bolǵan. Qarjy pıramıdasyna tartylǵan qarjynyń jalpy somasy 89,7 mln teńgeden asqan.
Tergeý barysynda salymshylardyń qarajaty qolma-qol jáne qolma-qol aqshasyz tásildermen qabyldanǵany anyqtaldy. Keıin olardyń bir bóligi qatysýshylar arasynda referaldyq tólemder túrinde qaıta bólinip, sondaı-aq krıptovalıýtaǵa aıyrbastalǵan.
- Budan bólek, qarjy pıramıdasyn keńinen taratý maqsatynda áleýmettik jeliler men ınternet-resýrstarda ornalastyrylǵan jarnamalyq beınerolıkter paıdalanylǵan. Jarnamanyń taralýy nátıjesinde qarjy pıramıdasynyń qyzmetine qosymsha azamattar tartylyp, olarǵa eleýli materıaldyq zalal keltirilgen. Sottyń aıyptaý úkimi shyǵarylyp, kináli tulǵalar 5 jyl merzimge bas bostandyǵynan aıyryldy. Azamattyq talap 60 mln teńgeden astam somaǵa qanaǵattandyryldy. Úkim zańdy kúshine engen joq, - dep habarlady vedomstvodan.
Eske sala keteıik, budan buryn BQO-da 56 mln teńge bıýdjet qarjysyn jymqyrǵan merdigerler sottalǵanyn jazǵan edik.
