Qarjy pıramıdasyn qalaı tanýǵa jáne alaıaqtardan qalaı qorǵanýǵa bolady

ASTANA. KAZINFORM – QR Qarjy naryǵyn retteý jáne damytý agenttigi qarjy pıramıdasy, onyń belgileri jáne alaıaqtardan qalaı saqtaný kerektigi jónindegi keńesterin usyndy.

Agenttiktiń baspasóz qyzmetiniń habarlaýynsha, alaıaqtardyń qurbany bolmas úshin qarjy pıramıdalarynyń negizgi belgilerin bilý mańyzdy.

Kóbine mundaı shemalardy kelesi belgilerden tanýǵa bolady:

qatysýshylardan bastapqy jarnany tóleýdi talap etedi;

naryqtyq kiristen edáýir joǵary kiristi ýáde etedi;

ásirese áleýmettik jelilerde agressıvti jarnamalar beredi;

jańa salymshylardy tartý úshin bonýstar usynady;

kompanııanyń qyzmeti men qarjylyq jaǵdaıy týraly ashyq aqparat joq;

uıymda Qarjy naryǵyn retteý jáne damytý agenttigi bergen halyqtyń salymdaryn tartýǵa lıtsenzııasy nemese baǵaly qaǵazdar naryǵynda jumys isteýge ruqsaty joq.

Túrli ataýyna qaramastan, qarjy pıramıdalarynyń jumys qaǵıdaty árdaıym birdeı: qatysýshylardyń kiristeri jańa qarajat esebinen ǵana qalyptasady. Alǵashqy salymshylar tólemderdi keıin kelgender engizgen aqshadan alady.

Mundaı shemalardyń zamanaýı uıymdastyrýshylary senimdilik ıllıýzııasyn jasap, jańa qurbandardy tez tabý úshin IT tehnologııalaryn, psıhologııalyq ádisterdi, áleýmettik jelilerdi jáne messendjerlerdi paıdalanady. 

Tabys tabýdyń negizi naqty taýar nemese qyzmet bolyp tabylatyn jelilik marketıngten aıyrmashylyǵy, qarjy pıramıdasy jańa qatysýshylardyń aqshasyna ǵana negizdelgen.

-Búgingi tańda mundaı shemalar býkmekerlik keńseler nemese ınvestıtsııalyq jobalar retinde jasyrylǵan. Alaıaqtar klıentterge lıtsenzııasyz jáne messendjerler arqyly jalǵan chekter bere otyryp, «utatyn» stavkalardy usyna alady. Taǵy bir format – joǵary paıdaǵa ýáde beretin onlaın-jobalarǵa «ınvestıtsııalar». Uıymdastyrýshylar qarajatty jetkilikti mólsherde jınaǵannan keıin, joba kenetten jabylyp, ony qurýshylar joǵalyp ketedi,-delingen habarlamada. 

Este saqtaý mańyzdy: qarjy pıramıdalaryn qurý jáne oǵan qatysý QR Qylmystyq kodeksiniń 217-baby boıynsha jazalanady. Eń joǵary jaza – múlki tárkilenip, belgili bir laýazymdardy atqarýǵa nemese belgili bir qyzmetpen aınalysýǵa ómir boıyna tyıym salyna otyryp, 12 jylǵa deıin bas bostandyǵynan aıyrý.

Osyǵan dein «Nazira Gold» qarjy pıramıdasynan 402 mln teńge óndirip alynǵany týraly jazdyq.