Qarjy pıramıdalaryna aqsha quıǵan jetisýlyqtar 220 mln teńgege aldandy
Jetisý oblystyq ekonomıkalyq tergeý departamentiniń qyzmetkerleri «Q-net», «Amanat drive» jáne «Elous» kompanııalaryna qatysty tekserý júrgizip, asa úlken kólemdegi qarjy alaıaqtyǵyn anyqtady, dep habarlaıdy Kazinform.
Tekserý nátıjesinde bir ǵana Q-net qarjy pıramıdasy jetisýlyqtardyń 220 mıllıon teńge qarajatyn aldap alyp, san soqtyrǵany belgili boldy.
Qazir departament mamandary jasandy ıntelekt quraldarynyń kómegimen ınternet jelisindegi zańsyz qarjy aınalymy men kúmándi aýdarymdarǵa qatysty aqparattardy izdeıdi. Nátıjesinde qarjy pıramıdasynyń belgileri anyqtalǵan saıttar kıberqadaǵalaý júıesi arqyly buǵattaý úshin ýákiletti organǵa jiberiledi.
Mysaly, jaqynda Taldyqorǵan qalasynda kúmándi ınvestıtsııalyq jobalarǵa tartylǵan qarjy týraly derekter anyqtalyp, kezekti pıramıdanyń joly kesilgen.
«ІT-quraldaryn paıdalana otyryp júrgizilgen taldaý nátıjesinde Taldyqorǵan qalasy boıynsha «Instagram» áleýmettik jelisi arqyly jumys istegen qarjy pıramıdalarynyń qyzmeti áshkerelendi. Bul akkaýnt ıeleri qarjy pıramıdasyn jarnamalap, azamattardy ınvestıtsııalyq jobalarǵa tartýmen aınalysqan. Biz dereý veb-saıtty buǵattadyq. Eger sharalar qabyldanbasa, onyń saldary azamattarǵa úlken zııan keltirip, áleýmettik shıeleniske ákelip soqtyratyny anyq edi», - deıdi Jetisý oblystyq ekonomıkalyq tergeý departamentiniń asa mańyzdy ister jónindegi tergeýshisi Erbol Qurmanbaev.
