Qarjy pıramıdalary men zańsyz jarnamaǵa qarsy sharalar kúsheıtildi
ASTANA.KAZINFORM – Sońǵy jyldary qarjy pıramıdalary men olarǵa qatysty alaıaqtyq shemalarǵa qarsy kúres kúsheıtildi. Bıyldyń ózinde elimizde 41 qarjy pıramıdasy qyzmetin toqtatty. Bul týraly «Jibek Joly» telearnasynyń tikeleı efırinde aıtyldy.
– Qarjy pıramıdalaryn jarnamalaý jáne solarǵa qatysty alaıaqtyq áreketter úshin Qylmystyq kodekske jańa baptar engizildi. Sonymen qatar dropperler men basqa da deldal tulǵalarǵa qatysty qylmystyq jaýapkershilik qarastyrylǵan. Eger úleskerdiń zańsyz áreketke qatysy dáleldense, QK-niń 28-baby aıasynda quqyqtyq baǵa beriledi, – dedi Bas prokýratýranyń basqarma aǵa prokýrory Sultan Battalov.
Zańsyz jarnama boıynsha da ákimshilik quqyq buzýshylyq týraly kodekste birneshe bap kózdelgen. Atap aıtqanda, 455-bap lotereıa men zańsyz oıyn bıznesin jarnamalaýǵa baılanysty teris áreketterge quqyqtyq baǵa beredi.
QR Qarjylyq monıtorıng agenttigi Tergeý departamenti basshysynyń orynbasary Keńesary Baǵbanulynyń aıtýynsha, QK-niń 217-1-baby 2023 jyly engizilgen jáne osy bap boıynsha onnan astam adam jaýapqa tartylǵan.
– Birneshe bloger de zańsyz jarnama jasaǵany úshin ákimshilik jaýapkershilikke tartyldy, – dedi ol.
Memleket tarapynan qarjy qaýipsizdigin qamtamasyz etý jáne azamattardyń quqyqtaryn qorǵaý baǵytyndaǵy jumystar júıeli túrde jalǵasyp jatyr.
Buǵan deıin, keıingi jyldary elde úlestik qurylys, ınvestıtsııalyq jobalar men jalǵan qaıyrymdylyq qorlaryna qatysty alaıaqtyq shemalardyń kúrt kóbeıip ketkenin jazǵanbyz.