Qarjy ombýdsmeniniń biryńǵaı ofısi qurylmaq

ASTANA. KAZINFORM – Bank ónimderin tutynýshylardyń quqyqtaryn tıimdi qorǵaý úshin daýlardy sotqa deıin retteýdiń úsh deńgeıli júıesi engiziledi. Bul týraly Májilistiń jalpy otyrysynda bank qyzmeti týraly zań jobasyn tanystyrǵan Qarjy naryǵyn retteý jáne damytý agenttiginiń tóraǵasy Mádına Ábilqasymova aıtty.

- Zań jobasy aıasynda táýekelge baǵdarlaný qaǵıdattarynda is-qımyldy qadaǵalaýdyń tolyqqandy modelin engizý kózdelgen. Jańa model is-qımyl táýekelderin basqarý júıesin qurýdy kózdeıdi. Oǵan is-qımyl táýekelderin basqarý strategııasy, qarjy ónimderin baǵalaý boıynsha táýelsiz bólimsheler qurý, qarjy ónimderin basqarý boıynsha, qarjy ónimderi týraly tutynýshylarǵa tolyq jáne shynaıy aqparatty jetkizý boıynsha qarjy uıymdaryna qoıylatyn talaptar, sondaı-aq tutynýshylardan keri baılanysty taldaý kiredi, - dedi agenttik basshysy.

Mádına Ábilqasymovanyń aıtýynsha, zań jobasynda josyqsyz praktıkalardyń mynadaı tizbesi bekitildi:

• qyzmetterdi májbúrleý;
• naqty qunyn jasyrý; 
• jańylystyratyn aqparatty taratý. 

- Agenttikke tutynýshylardyń múddelerine zııan keltirýi múmkin ónimderdi satýdy toqtatý boıynsha ókilettikter beriledi. Sonymen birge zań jobasynda bank, saqtandyrý jáne mıkroqarjylyq qyzmetter boıynsha qarjy ombýdsmanynyń biryńǵaı ofısin qurý kózdeledi. Ombýdsmenniń sheshimderin qarjy uıymdary oryndaýǵa mindetti. Bul azamattardyń joldanymdaryn qaraýdyń birkelkiligi men táýelsizdigin qamtamasyz etýge múmkindik beredi, - dedi ol.

Vedomstvo basshysynyń sózine qaraǵanda, tutynýshylardyń quqyqtaryn tıimdi qorǵaý úshin daýlardy sotqa deıin retteýdiń úsh deńgeıli júıesi engiziledi. Shaǵymdardy bastapqyda qarjy uıymdary qaraıdy. Odan keıin qarjy ombýdsmenine jáne agenttikke júginedi.

Buǵan deıin el aýmaǵynda tsıfrlyq qarjy aktıvteriniń aınalymyna ruqsat berilýi múmkin ekenin jazǵan edik.