Qarjy naryǵyndaǵy serpin: OPEK+ óndiristi arttyrdy, teńge qalpynda
ASTANA. KAZINFORM – Munaı baǵasy 2,7%-ǵa ósti. Bul – turaqty suranystyń belgileri baıqalǵanymen, OPEK+ uıymynyń munaı óndirý kólemin arttyrýyna qaramastan ósim baıqalǵan. Bul týraly Qazaqstan qarjygerler qaýymdastyǵy málim etti.
Munaı baǵasy
AQSh-tyń Táýelsizdik kúnine oraı 72 mıllıon amerıkalyq saparǵa shyǵýdy josparlaǵan. Bul rekordtyq kórsetkish.
Valıýta naryǵy
Juma kúngi valıýtalyq saýdanyń qorytyndysy boıynsha, USD/KZT juby derlik ózgerissiz qaldy – 1 dollar úshin 519,5 teńge (-0,01 teńge).
Saýda belsendiligi kúrt tómendedi: saýda kólemi 229,7 mln dollardy qurady (jyl basynan bergi ortasha kúndik kólem – 239,3 mln dollar).
Múmkin, iri qatysýshylar ımporttyq kelisimsharttardy jáne syrtqy mindettemelerdi tóleý aıasynda shetel valıýtasyna degen suranysty qanaǵattandyrǵan soń, satyp alý kólemin qysqartqan.
Teńgege qoldaý kórsetip otyrǵandar qatarynda – Ulttyq bank, Qarjy mınıstrligi qurylymdary jáne eksporttaýshylar bolýy múmkin.
Aqsha naryǵy
Uzaq demalys kúnderi qarsańynda aqsha naryǵyndaǵy mólsherlemeler aıtarlyqtaı ózgermedi.
TONIA mólsherlemesi 15,51%-dan 15,52%-ǵa kóterildi, al SWAP-1D tabystylyǵy 11,02% deńgeıinde qaldy.
Jalpy saýda kólemi – 382,3 mlrd teńge (-27,5 mlrd).
Ulttyq banktiń depozıttik aýktsıonynda suranys 1,2 trln teńgege deıin azaıdy (-616 mlrd) jáne tolyq qanaǵattandyryldy (mólsherleme – jyldyq 16,5%).
Ulttyq banktiń ashyq pozıtsııasy – 7,8 trln teńge deńgeıinde qaldy.
Qor naryǵy
Juma kúngi saýda nátıjesinde KASE ındeksi 0,67%-ǵa ósip, 6 113,14 pýnktke jetti. Bul – satyp alý belsendiliginiń basymdyǵymen baılanysty.
Ósýge negizinen Halyq bankiniń (+2,5%) jáne BTsK-nyń (+1,2%) aktsııalary úles qosty.
Kerisinshe, QMG aktsııalary 0,6%-ǵa arzandady.
Kóptegen «kók fıshkalardyń» oń dınamıkasy naryqtyń turaqty kóńil-kúıin jáne ınstıtýtsıonaldyq ınvestorlardyń belsendiligin kórsetedi.
Munaı
Dúısenbi kúni munaı baǵasy 1 barrel úshin 69,6 dollarǵa deıin ósti (+2,7%).
Bul – OPEK+ tamyz aıynda óndiristi kútkennen joǵary kólemde arttyrǵanyna jáne AQSh tarıfterine qatysty jańa qaýipterge qaramastan, turaqty suranys belgileriniń basymdyǵymen túsindiriledi.
Ótken aptada jarııalanǵan týrızm salasy statıstıkasyna sáıkes, 72 mln amerıkalyq 4 shildede – Táýelsizdik kúninde – saparǵa shyǵýdy josparlaǵan.
Sonymen qatar, OPEK+ jahandyq naryqtaǵy úlesin qalpyna keltirý úshin buryn engizilgen shekteýlerdi birtindep alyp tastaýdy jalǵastyrýda.
Ótken demalysta alıans tamyz aıynda óndiristi táýligine 548 myń barrelge arttyrý týraly sheshim qabyldady – bul qatarynan tórtinshi aılyq ósim, ári analıtıkterdiń boljamynan asyp tústi.
Táýekeldi aktıvter
Úsh iri amerıkalyq bırja ındeksi 0,8–0,9%-ǵa tómendedi. Bul – AQSh prezıdenti Donald Tramptyń tarıftik málimdemeleriniń kúsheıýine baılanysty.
AQSh Japonııa men Ońtústik Koreıadan keletin taýarlarǵa 25% tarıf engizetinin habarlady. Sonymen qatar, Laostan Serbııaǵa deıingi birneshe elderge de osyndaı habarlamalar jiberildi.
Bastapqyda tarıfter 10 shilde kúni kúshine enýi kerek edi, biraq bul merzim 1 tamyzǵa shegerildi.
Tramp bul tarıfter elder arasyndaǵy kelissózderge baılanysty ózgerýi múmkin ekenin aıtty. Ol sondaı-aq, Qytaı men Úndistan kiretin BRIKS-pen jaqyndasyp jatqan elderge 10% qosymsha tarıf engizý qaýpin de eskertti.
Syrtqy saýdaǵa táýeldi kompanııalardyń (Lululemon, Estee Lauder, Deere) aktsııalary 2% jáne odan kóp tómendedi.
Qorǵanys aktıvteri
Jahandyq naryqtardaǵy belgisizdik aıasynda qorǵanystyq aktıvterdiń baǵyty ártúrli boldy.
Altyn baǵasy 0,2%-ǵa ósip, bir ýntsııa úshin 3 344 dollarǵa jetti – geosaıası jáne saýda táýekelderi jaǵdaıynda naqty aktıvterge suranys saqtalyp otyr.
AQSh-tyń 10 jyldyq qazynashylyq oblıgatsııalarynyń tabystylyǵy 4,32%-dan 4,38%-ǵa ósti – bul FRJ-nyń qatań ustanymyn nemese ınflıatsııalyq kútýlerdiń kúsheıýin kórsetýi múmkin.
Sonymen qatar, AQSh dollarynyń ındeksi 0,5%-ǵa ósip, 97,5 pýnktke jetti. Buǵan tarıftik shıelenistiń kúsheıýi sebep bolyp, dollardy «qaýipsiz aılaq» retinde suranysqa ıtermeledi.
Eske sala keteıik, buǵan deıin OPEK+ uıymynyń 8 eli munaı óndirý kólemin tamyz aıynda táýligine 548 barrelge deıin ulǵaıtýdy kózdep otyrǵanyn jazǵan edik.