Qarjy naryǵyndaǵy alaıaqtyqqa qarsy is-qımyl tetikteri kúsheıtiledi

ASTANA. KAZINFORM – Ulttyq banktiń qaýlysy jobasyn qabyldaý qarjy naryǵyndaǵy qaýipsizdik deńgeıin arttyrýǵa jáne alaıaqtyqqa qarsy is-qımyl tetikterin kúsheıtýge baǵyttalǵan. Atalǵan joba «Ashyq NQA» portalynda qoǵamdyq talqylaýǵa jarııalandy. 

Joba alaıaqtyqqa qarsy is-qımyldyń tıimdiligin arttyrý, sondaı-aq qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy kúresti kúsheıtý maqsatynda ázirlendi. 

Qujat kúshine engen jaǵdaıda, Ulttyq banktiń Antıfrod-ortalyǵy qatysýshylarynyń quramy keńeıtilip, derekter almasý tıimdiligi artady. Bul kúmándi jáne alaıaqtyq belgileri bar tólem tranzaktsııalaryn erterek anyqtaýǵa, olardy buǵattaý jáne táýekelderdi basqarý sharalaryn jedel qabyldaýǵa múmkindik beredi. 

Áleýmettik-ekonomıkalyq turǵydan alǵanda, azamattardyń qarjy qarajatynyń saqtalý deńgeıi joǵarylap, qarjy uıymdaryna degen senim nyǵaıady. Sonymen qatar qarjy naryǵyndaǵy shyǵyndardyń qysqarýy men alaıaqtyq operatsııalar sanynyń tómendeýi kútiledi. Bul óz kezeginde tsıfrlyq qarjy qyzmetterin qaýipsiz paıdalaný mádenıetin qalyptastyrýǵa yqpal etedi.

Quqyqtyq turǵyda joba ulttyq zańnamany, sonyń ishinde «Tólemder jáne tólem júıeleri týraly» zańǵa engizilgen ózgeristermen sáıkestendirýge baǵyttalǵan. Nátıjesinde tólem uıymdary, bankter jáne baılanys operatorlary arasyndaǵy ózara is-qımyldyń biryńǵaı ári naqty reglamenti qalyptasady.

Jalpy alǵanda, qujatty qabyldaý qarjy naryǵyndaǵy ashyqtyqty arttyryp, alaıaqtyq táýekelderin tómendetýge múmkindik beredi dep kútilip otyr. 

Buǵan deıin Ulttyq bank tsıfrlyq teńgeni retteý qaǵıdalarynyń jobasyn jarııalady.

Sonymen qatar 1 qańtardaǵy jaǵdaı boıynsha Antıfrod-ortalyq alaıaqtyq belgisi bar 80 871 tranzaktsııany, sondaı-aq esirtki saýdasy men zańsyz oıyn bıznesine jáne qarjy pıramıdasyna qatysty 19 810-ǵa jýyq oqıǵany tirkegenin jazǵanbyz.