Qarjy naryǵynda jańa baqylaý júıesi iske qosylady
ASTANA. KAZINFORM — Qazaqstannyń Qarjy naryǵyn retteý jáne damytý agenttigi qarjylyq qyzmetterdi tutynýshylardyń quqyqtaryn qorǵaý jáne táýekelge negizdelgen jańa minez-qulyqtyq qadaǵalaý júıesin iske qosýǵa baǵyttalǵan normatıvtik aktiler toptamasyn maquldady.
Qarjy naryǵyn retteý jáne damytý agenttiginiń málimetinshe, jańa erejeler qarjy uıymdaryn tek zań talaptarynyń saqtalýyn baqylaýdan bólek, usynylatyn qarjylyq ónimderdiń tutynýshylar úshin qanshalyqty qaýipsiz ári qolaıly ekenin baǵalaýǵa kóshiredi.
Endi qarjy uıymdary ónimniń búkil ómirlik tsıkli barysynda klıentterdiń múddesin eskerýge mindetti bolady. Bul kezeńderge ónimdi ázirleý, naryqqa shyǵarý, qyzmet kórsetý, sharttaryn ózgertý jáne ony usynýdy toqtatý úderisteri kiredi.
Jańa model aıasynda bankter, mıkroqarjy jáne saqtandyrý uıymdary, sondaı-aq baǵaly qaǵazdar naryǵynyń jekelegen qatysýshylary qarjylyq ónimniń maqsatty aýdıtorııasyn, qunyn, yqtımal táýekelderin jáne onyń tutynýshylardyń qarjylyq múmkindikterine sáıkestigin baǵalaýǵa tıis bolady.
Sonymen qatar qarjylyq qyzmetterdi jarnamalaý men satý boıynsha biryńǵaı talaptar engiziledi. Uıymdar klıentterge ónimniń sharttary, quny, artyqshylyqtary jáne yqtımal táýekelderi týraly tolyq ári naqty aqparat berýge mindetteledi.
Jańa júıeniń maqsaty – azamattarǵa olardyń qajettiligine sáıkes kelmeıtin qarjylyq ónimderdiń usynylýyna jol bermeý jáne qarjy naryǵyna qatysýshylardyń jaýapty minez-qulyq úlgisin qalyptastyrý.
Buǵan deıin Qarjy naryǵyn retteý jáne damytý agenttigi klırıng qaǵıdalaryna ózgeris engizetinin jazdyq.
