Qarjy naryǵynda ashyqtyq artady: bankter táýekel týraly kóbirek aqparat jarııalaıdy
ASTANA. KAZINFORM — Qazaqstanda bankterdiń táýekelder týraly málimetterdi jarııa etýine qatysty jańa talaptardy qabyldaý kózdelip otyr. Tıisti qaýly jobasyn Qarjy naryǵyn retteý jáne damytý agenttigi ázirledi, dep habarlaıdy Kazinform agenttiginiń tilshisi.
Qujat ekinshi deńgeıdegi bankter men bank-rezıdent emesterdiń fılıaldary úshin táýekelderdi basqarý jáne ishki baqylaý júıesin qalyptastyrý qaǵıdalaryn belgileıtin №188 qaýlyǵa ózgerister engizedi.
Birinshi kezeńde, 2024 jyldyń jeltoqsanynda, bul qaǵıdalarǵa menshikti kapıtal men kredıttik táýekelder týraly aqparatty jarııalaý boıynsha tolyqtyrýlar engizilgen bolatyn. Jańa túzetýler paketi Bazel III (Pillar 3) standarttaryn engizýdiń ekinshi kezeńi bolady.
Jobaǵa sáıkes, bankter keńeıtilgen eseptilikti usynýǵa mindetti bolady:
-
Operatsııalyq táýekel boıynsha – táýekeldiń sıpaty men ony basqarý týraly jalpy málimetter, sondaı-aq tarıhı zalaldardy kórsetetin kesteler;
-
Naryqtyq táýekel boıynsha – táýekeldiń sıpaty men kózderi, ony baǵalaý ádisteri jáne táýekeldiń mólsheri týraly aqparat. Bul málimetter standarttalǵan tásilmen eseptelip, paıyzdyq, qorlyq, valıýta jáne taýar táýekelderine jikteledi;
-
Ótimdilik táýekeli boıynsha – ótimdilikti basqarý saıasaty týraly málimetter jáne ótimdilikti jabý koeffıtsıentteri (LCR, NSFR) kórsetilgen kesteler.
— Joba Bazel III talaptaryn kezeń-kezeńimen engizý aıasynda aqparatty ashý tártibin engizý úshin ázirlendi. Bul ekinshi deńgeıli bankterde ashyqtyqty arttyrý men naryqtyq tártipti nyǵaıtýǵa baǵyttalǵan, — dep túsindirdi agenttik.
Ózgeristerdiń basty maqsaty — bankterdiń ashyq jumys isteýin qamtamasyz etý, al klıentter, ınvestorlar men retteýshi naqty táýekelderdi kórip, bank qanshalyqty turaqty ekenin aldyn ala baǵalaı alýy tıis. QNRDA qujatty qabyldaý áleýmettik-ekonomıkalyq nemese quqyqtyq teris saldarǵa ákelmeıtinin atap ótti.
Buǵan deıin biz Qazaqstanda jańa bank týraly zań daıyndalyp jatqanyn, onyń ne úshin qajet ekenin jáne neni ózgertetinin habarlaǵan bolatynbyz.