Qarjy naryǵyn retteý jáne damytý boıynsha biryńǵaı úılestirý alańyn qurý bastamasy maquldandy
ASTANA. KAZINFORM – Bul týraly QR Ulttyq bankiniń tóraǵasy Tımýr Súleımenovtiń basshylyǵymen Qarjylyq turaqtylyq jónindegi keńestiń (budan ári – Keńes) kezekti otyrysynda málim boldy.
Keńes jumysyna QR Qarjy naryǵyn retteý jáne damytý agenttiginiń (budan ári – Agenttik) tóraǵasy Mádına Ábilqasymova, QR Qarjy mınıstri Mádı Takıev jáne «Astana» halyqaralyq qarjy ortalyǵynyń (budan ári – AHQO) basqarýshysy Renat Bekturov qatysty.
Keńes otyrysynda QUB, Agenttik, Qarjy mınıstrligi jáne AHQO qatysýymen qarjy naryǵyn retteý jáne damytý boıynsha biryńǵaı úılestirý komıssııasyn qurý isi maquldandy.
Onyń qyzmeti aıasynda vedomstvoaralyq úılestirý, tájirıbe almasý, sondaı-aq qarjy sektoryn qaryshtap damytýǵa baǵyttalǵan negizgi júıelik jáne strategııalyq máseleler qaralady. Komıssııa qurý isi retteýshiler arasyndaǵy ózara is-qımyl tıimdiligin arttyrýǵa, eldegi bırjalyq alańdar arasynda sınergııany qamtamasyz etýge, kapıtaldy syrtqa shyǵarýǵa qarsy is-qımyl men salyqtan jaltarý máseleleri boıynsha kelisilgen tásilderdi ázirleýge jáne vedomstvoaralyq úılestirýdi kúsheıtýge múmkindik beredi, sondaı-aq Qazaqstannyń qarjy salasyndaǵy halyqaralyq pozıtsııasyn da nyǵaıtady.
Bul bastama Qazaqstan Respýblıkasy Úkimetiniń, QUB pen Agenttiktiń 2026-2028 jyldarǵa arnalǵan makroekonomıkalyq turaqtandyrý jáne halyqtyń ál-aýqatyn arttyrý jónindegi birlesken is-qımyl baǵdarlamasy aıasynda iske asyrylyp otyr.
Sonymen qatar, Keńes músheleri bıyl bank sektory aktıvteriniń sapasyn turaqty baǵalaý (AQR) jáne qadaǵalaý stress-testileýin (QST) ótkizý úshin Agenttik usynǵan bankter tizbesin maquldady.
-Keńes qarjy sektoryndaǵy ózekti máselelerdi talqylaý arqyly qarjylyq turaqtylyqty qamtamasyz etýge járdemdesý baǵytyndaǵy jumysyn jalǵastyrady,-delingen habarlamada.
Osyǵan deıin Qarjy naryǵyn retteý jáne damytý agenttigi klırıng qaǵıdalaryna ózgeris engizetini týraly jazdyq.
