Qarjy naryǵyn retteý jáne damytý agenttigi tóraǵasynyń orynbasary qyzmetinen ketti
ASTANA. KAZINFORM — 2019 jyldan beri Qarjy naryǵyn retteý jáne damytý agenttigi tóraǵasynyń orynbasary bolǵan Marııa Hadjıeva qyzmetinen bosatyldy.
Bul týraly Aqordanyń baspasóz qyzmeti málim etti.
— Memleket basshysynyń ókimimen Marııa Jamalovna Hadjıeva Qazaqstan Respýblıkasynyń Qarjy naryǵyn retteý jáne damytý agenttigi Tóraǵasynyń orynbasary laýazymynan bosatyldy, — delingen habarlamada.
Marııa Hadjıeva 1971 jylǵy 22 naýryzda dúnıege keldi.
Óziniń eńbek jolyn 1995 jyly QR Ádilet mınıstrliginiń Bas zańnama basqarmasynyń konstıtýtsııalyq jáne áleýmettik-mádenı zańnama bóliminiń jetekshi konsýltanty laýazymynan bastady.
Baǵaly qaǵazdar naryǵyndaǵy qyzmetin 2000 jyly QR Ulttyq Bankiniń zań departamenti baǵaly qaǵazdar naryǵyn jáne jınaqtaýshy zeınetaqy qorlaryn retteýdi quqyqtyq qamtamasyz etý basqarmasynyń bas mamany laýazymynan bastady.
2006 jylǵy qarasha — 2008 jylǵy mamyr aralyǵynda QR Qarjy naryǵy men qarjy uıymdaryn retteý jáne qadaǵalaý agenttiginiń baǵaly qaǵazdar naryǵynyń sýbektilerin jáne jınaqtaýshy zeınetaqy qorlaryn qadaǵalaý departamenti dırektorynyń orynbasary bolyp jumys istedi. 2008 jylǵy mamyrda departament dırektory laýazymyna taǵaıyndalyp, 2011 jylǵa deıin jumys istedi.
2011 jyldan bastap — QR Ulttyq Bankiniń Qarjy naryǵyn jáne qarjy uıymdaryn baqylaý men qadaǵalaý komıteti tóraǵasynyń orynbasary.
2014 jyldan bastap QR Ulttyq Bankiniń baǵaly qaǵazdar naryǵynyń sýbektilerin qadaǵalaý departamentiniń dırektory laýazymyn atqardy. Odan keıin 2016 jyly Baǵaly qaǵazdar naryǵy departamentin basqardy. 2017 jyly «Baǵaly qaǵazdardyń biryńǵaı tirkeýshisi» AQ Basqarmasy Tóraǵasynyń orynbasary laýazymyna taǵaıyndalyp, bir jyldan keıin oǵan basshylyq etti.
Túrli jyldary «Kazkommerts Sekıýrıtız», «Baǵaly qaǵazdardyń ortalyq depozıtarııi», «Baǵaly qaǵazdardyń biryńǵaı tirkeýshisi», «Saqtandyrý tólemderine kepildik berý qorynyń», Qazaqstan qor bırjasynyń Dırektorlar keńesiniń quramyna kirdi.
2019 jyly M. J. Hadjıeva Qazaqstan qarjygerleri qaýymdastyǵynyń Keńes Tóraǵasynyń birinshi orynbasary bolyp taǵaıyndaldy.
2019 jylǵy 26 jeltoqsanda Qazaqstan Respýblıkasy Qarjy naryǵyn retteý jáne damytý agenttigi tóraǵasynyń orynbasary bolyp taǵaıyndaldy.
Budan buryn Memleket basshysynyń Jarlyǵymen Qazaqstan halqy Assambleıasyn damytýdyń 2030 jylǵa deıingi «Birligimiz — áralýandyqta» tujyrymdamasy bekitildi.