Qarjy naryǵyn retteý jáne damytý agenttigi klırıng qaǵıdalaryna ózgeris engizbek

ASTANA.KAZINFORM – QR Qarjy naryǵyn retteý jáne damytý agenttigi klırıng qaǵıdalaryna ózgeris engizý jónindegi qaýly jobasyn qoǵamdyq talqylaýǵa shyǵardy. Qujat bankaralyq tólem kartochkalary júıesindegi esep aıyrysýlardy avtomattandyrýdy kózdeıdi.

– Ózgerister tólem kartochkalarynyń bankaralyq júıesinde esep aıyrysýlardyń aıaqtalýyn qamtamasyz etý júıesi sheńberinde ózara is-qımyl shemasyn ońtaılandyrýǵa baǵyttalǵan. Atap aıtqanda, joba «KASE klırıngtik ortalyǵy» AQ-nyń Ulttyq banktiń esebinen qatysýshynyń esep aıyrysýlary tolyq aıaqtalǵan kezde qamtamasyz etý somasyn avtomatty túrde berý tetigin jetildirýdi kózdeıdi, – delingen qujatta.

Bul rette qarajat qatysýshynyń ókiminsiz Ulttyq banktiń menshigine berý arqyly aýdarylady. Ózgerister bankaralyq tólem kartochkalary júıesine qatysýshylar úshin esep aıyrysýlardy aıaqtaý rásimin avtomattandyrýǵa múmkindik beredi.

Ázirleýshi organnyń atap ótýinshe, atalǵan normatıvtik quqyqtyq akt jobasyn qabyldaý teris áleýmettik-ekonomıkalyq nemese quqyqtyq saldarǵa ákelmeıdi.

Qujat «Ashyq NQA» portalynda jarııa talqylaýda tur. Qoǵamdyq talqylaý 3 aqpanǵa deıin jalǵasady.

Buǵan deıin, Ulttyq bank qazaqstandyq úsh bankpen birlesip bankaralyq QR-tólemder servısin iske qosqanyn jazǵanbyz.