Qarjy naryǵyn retteý agenttigi qaryz júktemesin azaıtýǵa baǵyttalǵan shara qabyldamaq

ASTANA. KAZINFORM — Qyrkúıek aıynda Qarjy naryǵyn retteý jáne damytý agenttigi qaryz alýshylardyń quqyqtaryn qorǵaýǵa qatysty 11 672 ótinishti qarady. Ótinishterdiń kópshiligi alaıaqtyq áreketterge, tutynýshylyq qaryzdardy qaıta qurylymdaýǵa kómek kórsetýge jáne boryshty azaıtý sharalaryna qatysty boldy. Tamyz aıymen salystyrǵanda ótinishterdiń sany 4,5%-ǵa artty.

Ótinishterdiń jartysynan kóbi (52,4%) bankterge, 36,6%-y mıkroqarjylyq uıymdarǵa, 8,8%-y kollektorlyq agenttikterge, 1,9%-y saqtandyrý kompanııalaryna, 0,3%-y basqa uıymdarǵa qatysty bolǵan.

Agenttik zań buzýshylyqtardy anyqtap, qarjy uıymdaryna kelesi sharalardy qoldandy: 10 usynym, 2 jazbasha eskertý jáne 2 ákimshilik aıyppul (1,2 mln teńge). Bul sharalar, mysaly, 90 kúnnen artyq keshiktirilgen qaryz boıynsha ósimpul esepteý, merzimi ótken qaryz týraly habarlamaý, saqtandyrý tólemderin ýaqytynda jasamaý sııaqty máselelerge qatysty.

Sonymen qatar, Agenttik ıpotekalyq qaryzdardy qaıta qarjylandyrý baǵdarlamasyn iske asyrady. Baǵdarlama úsh baǵytta jumys isteıdi:

• 2004-2009 jyldary berilgen ıpotekalyq qaryzdar – 33,1 myń qaryzǵa 209,9 mlrd teńge qaıta qarjylandyryldy.
• 2016 jylǵa deıin berilgen valıýtalyq ıpotekalyq qaryzdar – 16 myń qaryzǵa 114,3 mlrd teńge qaıta qarjylandyryldy. Valıýtalyq qaryzdar 31 jeltoqsanǵa deıin aınaldyrylady.
• Qosymsha qoldaý sharalary – buryn baǵdarlamaǵa qatysqan qaryz alýshylarǵa qaryzyn azaıtý, jeńildetilgen tóleý kestesin jasaý jáne jalǵyz baspanasyn qaıtarý boıynsha kómek kórsetiledi. 1 qazanǵa qaraı 10,6 myń adamǵa 99,1 mlrd teńge kóleminde qoldaý berildi. Kómek kórsetý merzimi 31 jeltoqsanǵa deıin uzartyldy.

Agenttik bankter men qaryz alýshylarǵa qoldaý kórsetý arqyly azamattardyń borysh júktemesin azaıtyp, jalǵyz baspanasyn saqtap qalýyna kómektesýdi jalǵastyra bermek.

Aıta keteıik, elde kepilsiz tutynýshylyq qaryz berýge shekteý engiziledi.