Qarjy naryǵyn damytý agenttigi saqtandyrý sharttaryn jasaǵanda saq bolýǵa shaqyrdy
ASTANA. KAZINFORM – Qarjy naryǵyn retteý jáne damytý agenttigi ınternet-resýrstardy monıtorıngteý barysynda saqtandyrý polısterin zańsyz rásimdeý syzbasyn anyqtady.
Vedomstvo málimetinshe, áleýmettik jelilerde saıttar men paraqshalar Qazaqstan Respýblıkasynyń lıtsenzııalanǵan saqtandyrý uıymdarynyń ataýlaryn paıdalanyp, saqtandyrý polısterin, onyń ishinde kólik quraldary ıeleriniń azamattyq-quqyqtyq jaýapkershiligin mindetti saqtandyrýdy onlaın-rásimdeýdi usynady. Sonymen qatar polısterdi belgilengen tarıfterden joǵary baǵamen satý jaǵdaılary da anyqtalyp jatyr.
- Mundaı qyzmetterdi usynatyn jeke tulǵalarda agenttiktiń saqtandyrý (qaıta saqtandyrý) qyzmetin júzege asyrýǵa lıtsenzııasy joq ekeni jáne saqtandyrý agentteri retinde tirkelmegeni anyqtaldy. «Saqtandyrý qyzmeti týraly» Zańnyń 18-baby 6-tarmaǵynyń ekinshi bóligine sáıkes, mindetti saqtandyrý sharttary boıynsha saqtandyrý agentteriniń deldaldyq qyzmetin júzege asyrýǵa jol berilmeıdi. Mundaı polısterdi lıtsenzııasy bar saqtandyrý kompanııasy arqyly ǵana rásimdeýge bolady, - dedi vedomstvodan.
Osyǵan baılanysty agenttik azamattardy ınternet arqyly saqtandyrý sharttaryn jasasý kezinde asa muqııat bolýǵa shaqyryp, mynadaı keńes beredi:
- saqtandyrý uıymynda saqtandyrý qyzmetin júzege asyrýǵa lıtsenzııasynyń bolýyn tekserý kerek, lıtsenzııasy bar saqtandyrý kompanııalarynyń tizimimen agenttiktiń resmı ınternet-resýrsynda tanysýǵa bolady;
- jarnamadaǵy usynystarǵa synmen qarap, saqtandyrý polısterin saqtandyrý uıymdarynyń resmı saıttarynda ǵana rásimdegen jón;
- mindetti saqtandyrý sharttary boıynsha deldaldyq qyzmetterge aqy tólemeý, sondaı-aq aqsha qarajatyn úshinshi tulǵalardyń belgisiz banktik shottaryna, telefon nómirlerine jáne ózge de derektemelerine aýdarmaý kerek;
- jeke kýálikti, júrgizýshi kýáligin, kólik quralyn tirkeý týraly kýálikti (tehnıkalyq pasportty) jáne basqa da derbes derekterdi qosa alǵanda, jeke qujattardyń kóshirmelerin nemese fotosýretterin úshinshi tulǵalarǵa bermeý qajet.
- Tekserilmegen ınternet-resýrstar arqyly saqtandyrý shartyn jasaý jaramsyz saqtandyrý polısin satyp alýǵa jáne sonyń saldarynan saqtandyrý qorǵaýynyń bolmaýyna ákelýi múmkin ekenin eske salamyz. Saqtandyrý qyzmetterin usynatyn kúdikti ınternet-resýrstar anyqtalǵan jaǵdaıda azamattarǵa bul týraly agenttikke habarlaýǵa nemese turǵylyqty jeri boıynsha quqyq qorǵaý organdaryna júginýge keńes beriledi,- dedi agenttikten.
Aıta keteıik, 2025 jyly qazaqstandyqtar 2,7 mlrd teńgeden astam saqtandyrý tólemderin alǵan.
