Qarjy mınıstrliginiń Astana men Almatydaǵy basqarma basshylary paramen ustaldy - Antıkor
ASTANA. KAZINFORM – Arnaıy operatsııa barysynda Almaty jáne Astana qalasynda sybaılas jemqorlyq qylmys jasaǵany úshin Qarjy mınıstrligi basqarmalarynyń basshylary áshkerelendi. Bul týraly Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov málim etti.
«Memleket basshysynyń tapsyrmasy boıynsha bıznesti memlekettik organdar tarapynan zańsyz aralasýynan qorǵaý sybaılas jemqorlyqqa qarsy qyzmettiń turaqty baqylaýynda. Sybaılas jemqorlyqqa qarsy is-qımyl agenttiginiń Almaty qalasy boıynsha departamenti salyq tekserýlerine oń ruqsat bergeni úshin Qarjy mınıstrliginiń laýazymdy tulǵalary kásipkerlik sýbektilerinen aqsha qarajatyn zańsyz alý jónindegi qylmystyq is qozǵaldy», - dedi Danııar Bıgaıdarov agenttikte ótken baspasóz máslıhatynda.
Resmı ókildiń aıtýynsha, arnaıy operatsııa barysynda Almaty jáne Astana qalasynda sybaılas jemqorlyq qylmys jasaǵany úshin Qarjy mınıstrligi basqarmalarynyń basshylary áshkerelendi.
«Olar kásiporynǵa 570 mıllıon teńge kóleminde salyqty tolyq somaǵa azaıtýǵa jatatyn negizsiz qosymsha esepteý týraly aqparatqa qol jetkize otyryp, deldal arqyly osy fırmanyń ókiline júginip, odan aqshalaı syıaqy talap etti degen kúdikke ilikti. Laýazymdy tulǵalar máseleni sheshý syltaýymen onyń 68 mıllıon teńge somasyndaǵy aqshalaı qarajatyn ıemdendi. Qarjy mınıstrliginiń laýazymdy tulǵalary men deldal qylmystyq jaýapkershilikke tartyldy. Sottyń sanktsııasynan kúdiktiler elektrondy bilezik salynyp, úı qamaqqa alyndy», - deıdi ol.
Sondaı-aq qylmystyq quqyq buzýshylyqqa basqa da tulǵalardyń qatysynyń bar-joǵy anyqtalatynyn aıtty. Tergeý amaldary jalǵasyp jatyr.
Eske sala ketsek, Qarjy mınıstrliginde jemqorlyq nege kóp degen másele buǵan deıin de qozǵalǵan edi.
