Qarjy mınıstrligi turǵyndardyń shottaryn jappaı buǵattaý jaǵdaıyn túsindirdi
ASTANA. KAZINFORM – Qarjy vıtse-mınıstri Erjan Birjanov 9 sáýirde elde bank shottaryn jappaı buǵattaý sebebine túsinik berdi.
Onyń aıtýynsha, bul oqıǵa jańa aqparattyq júıelerdi engizý kezindegi tehnıkalyq irkiliske baılanysty boldy.
— Qazir kedendik jáne salyq júıelerin tolyq kólemde jańǵyrtýdy engizip jatyrmyz. Bul salyq salasyndaǵy ákimshilendirýdiń ıntegratsııalanǵan júıesin engizý aıasynda mundaı jaǵdaı boldy. Bul oryndalmaǵan bereshek týraly habarlamalarǵa qatysty. Atap aıtqanda, júıe shartty túrde aldyńǵy kezeńderde qaryzy bar barlyq bereshegi barlardy avtomatty túrde qamtyǵan. Osy oraıda 1 qańtardan bastap barlyq qaryzdardy shyǵarý mindeti qoıylǵan edi, - dedi E.Birjanov.
Onyń aıtýynsha, táýlik ishinde tehnıkalyq máseleler tolyq sheshildi.
— Rasynda, qolaısyz jaǵdaı boldy. Mundaı tehnıkalyq irkilister oryn alatynyn moıyndaımyz. Eń bastysy, bul júıeni engizdik. Jańa júıelerdi engizý qýattardy arttyrýǵa, bıznespen jumysty jeńildetýge múmkindik berdi. Kez kelgen jańa júıede bastapqyda aqaýlar bolady. Sondyqtan osy júıeni jaqsartýǵa erekshe mán berilgen, - dedi vıtse-mınıstr.
Eske salsaq, bıyl aqpan aıynda Qarjy mınıstrligi Memlekettik kirister komıtetiniń Aýdıt departamenti bereshekpen jumys basqarmasynyń basshysy Qaısar Aryn jańa 2026 jyldyń birinshi qańtarynan bastap salyq bereshegin óndirip alýdyń tártibi qalaı ózgergenin aıtty.
