Qarjy mınıstrligi salyq boryshkerleriniń tizimin jarııalamaq

ASTANA. KAZINFORM — Jańa Salyq kodeksinde bıznestiń salyq bereshekterin óndirý sharalary kózdelgen. Bul týraly Májilistiń jalpy otyrysynan keıin Qarjy vıtse-mınıstri Erjan Birjanov málim etti. 

— Salyq kodeksine sáıkes, salyq bereshegi salyqtyq qupııaǵa jatpaıdy. Salyq tólemeı júrgen boryshkerlerdiń tizimin jarııalaımyz. Tizimdi saıtymyzǵa ornalastyra alamyz, — dedi ol.

Onyń atap ótýinshe, endi salyq organdary bıznestiń bolmashy salyq somasy úshin búkil qyzmetine tosqaýyl qoımaıdy. Ádis ózgeredi.

— Burynyraq zeınetaqy ne áleýmettik tólemder boıynsha 100 teńge borysh bolǵan jaǵdaıda esepshot buǵattalatyn. Qazir salyq boıynsha shekti 20 AEK-ten joǵary, bul shamamen 80 myń teńge, qaıta qaradyq. Oǵan deıin jaı ǵana habarlandyrý jiberiledi. Boryshyńyz bar ekenin, sizge ósimpul esepteletinin eskertemiz. Kelesi qadam - 20-dan 45 AEK-ke deıin, 180 myń teńgege deıin biz ınkassatsııalyq ókim bankińizge qoıylatynyn, salyqty tóleý qajettigin aıtamyz. Eger ol atalǵan somany tólemese, onda múlikti tizimge alý jáne ony satý júzege asyrylady. Sanktsııa salyq mólsherine qaraı qoldanylady. Bolmashy somaǵa bola banktik esepshot buǵattalmaıdy, — dedi Erjan Birjanov.

Aıta keteıik, búgin Premer-mınıstrdiń orynbasary Májilistiń jalpy otyrysynda Salyq kodeksiniń jobasyndaǵy sońǵy ózgeristerdi atady.