Qarjy mınıstrligi memsatypalymǵa qatysatyn qurylys uıymdarynyń jumysyn baqylaýdy kúsheıtti
ASTANA. KAZINFORM - Qarjy mınıstrligi memlekettik satypalymǵa qatysatyn qurylys uıymdarynyń jumys tájirıbesin baqylaýdy kúsheıtti, dep habarlaıdy mınıstrliktiń baspasóz qyzmeti.
Baspasóz qyzmetiniń málimetterine qaraǵanda, kez kelgen adamdy oryndalatyn jumystyń sapasy alańdatatyny belgili. Qurylys, jóndeý jumystary nemese materıaldardy jetkizý syndy qyzmetti usynatyn uıymdardyń qajetti biliktiligi men jaýapkershiligi bolǵany abzal. Sebebi, mol tájirıbeniń bolýy búginde túrli jobany sátti aıaqtaýdyń kepili.
Bul rette QR Qarjy mınıstrligi salalyq memlekettik organdarmen jáne «Atameken» UKP birlesip, qurylys sektoryndaǵy memlekettik satypalym naryǵyna qatysýshylardyń tájirıbesin baǵalaýdyń qoldanystaǵy tetikterin qaıta qaraýǵa kiriskenin aıta keteıik.
Jumys tájirıbesin rastaýdyń tyń tásilderine mynalar kiredi:
Tapsyrys berýshi úkimettik emes zańdy tulǵalar bolyp sanalatyn ári bıýdjetten tys jobalar boıynsha tehnıkalyq jaǵynan kúrdeli nysandar boıynsha tájirıbeni esepke alý (aqparat «Memsaraptama» RMK júıesi arqyly rastalady);
Esepke alynatyn nysandardyń sanyn shekteý – qatysýshynyń baǵa usynysyna áser etetin ólshemshart retinde tájirıbeni baǵalaý kezinde jylyna úsh nysannan aspaýy tıis;
Memlekettik ınvestıtsııalar esebinen ǵana qarjylandyrylatyn memlekettik uıymdar men kvazımemlekettik sektor sýbektileriniń nysandary boıynsha tájirıbeni rastaý (saraptama qorytyndysynda kórsetiledi);
Kvazımemlekettik sektordyń nysandary boıynsha qosymsha talaptar: rastalatyn qujattardyń qatarynda habarlama talony men saraptama qorytyndysy talap etiledi.
Qarjy mınıstriniń m.a. 2025 jyldyń 6 tamyzyndaǵy №425 «Qazaqstan Respýblıkasy Qarjy mınıstriniń keıbir buıryqtaryna ózgerister men tolyqtyrýlar engizý týraly» (QR ÁM 2025 jylǵy 6 tamyzda № 36586 bolyp tirkeldi) tıisti buıryǵy alǵash ret resmı jarııalanǵan (zan.gov.kz) kúninen keıin kúntizbelik on kún ótken soń qoldanysqa engiziledi.
Osyǵan deıin Qarjy mınıstrliginiń 2,5 mlrd dollardyń eýrooblıgatsııalaryn shyǵaratyny týraly jazdyq.