Qarjy mınıstrligi ınvestıtsııalyq kompanııalarǵa lıtsenzııa bermeıtinin eskertti
ASTANA. KAZINFORM – QR Qarjy mınıstrligi áleýmettik jelilerde Qarjy mınıstri Mádı Takıevtiń atynan ınvestıtsııalyq qyzmetti júzege asyrýǵa lıtsenzııa berilgeni týraly taraǵan aqparattyń jalǵan ekenin málimdedi.
Mınıstrlik qoǵam men buqaralyq aqparat quraldaryn áleýmettik jelilerde taralyp jatqan mundaı málimetterge senbeýge shaqyrdy.
– Atalǵan aqparat jalǵan jáne shyndyqqa sáıkes kelmeıdi. Qazaqstan Respýblıkasynyń Qarjy mınıstrligi qarjy naryǵynda brokerlik, dılerlik, ınvestıtsııalyq nemese ózge de kásiptik qyzmetti lıtsenzııalaýmen aınalyspaıdy, – delingen mınıstrlik habarlamasynda.
Vedomstvo málimetinshe, Qazaqstanda ınvestıtsııalyq kompanııalardy, brokerlerdi jáne qarjy naryǵynyń basqa da kásibı qatysýshylaryn lıtsenzııalaý, tirkeý jáne olardyń qyzmetin qadaǵalaý zańnamada belgilengen ýákiletti memlekettik organnyń quzyretine jatady.
Qazaqstannyń qarjy naryǵynda qyzmet usynatyn kez kelgen uıym zańda belgilengen tirkeý rásiminen ótip, tıisti ruqsat alýǵa mindetti.
Aıta keteıik, ІІM aýlada otshashý uıymdastyrýǵa baılanysty qaýipsizdik talaptaryn eskertti.
