Qarjy mınıstrligi bızneske arnalǵan jańa onlaın servısti iske qosty

Budan bylaı kásipkerler memlekettik organdarǵa barmaı-aq jáne túrli aqparattyq júıelerge aýyspaı JK jaýyp, sol sekildi JShS tolyǵymen elektrondy formatta taratýǵa ótinish bere alady. Atalǵan fýnktsııa bızneske arnalǵan «bir tereze» qaǵıdatyn damytýdaǵy kezekti qadamnyń biri.

KBJK — kásipkerlerge Qarjy mınıstrliginiń negizgi tsıfrly servısterine jol ashatyn birtutas memlekettik portal. Platforma arqyly paıdalanýshylar habarlama alyp, salyq qyzmetterin qoldanyp, sondaı-aqanalıtıkalyq quraldarmen jumys istep, kontragenttermenózara árekettesip, JI-kómekshisiniń keńesin ala alady.

Buǵan deıin JK qyzmetin toqtatý nemese JShS taratý rásimi tıisti organdarǵa tikeleı júginip, qujattar paketin daıyndaýdy talap etetin. Endi barlyq protsess — ótinish berýden bastap nátıjege deıin biryńǵaı kabınette onlaın rejimde qoljetimdi.

Aıtalyq, jeke kásipkerler memlekettik kirister organdaryna barmaı-aq birneshe qadam jasap, ótinish berý arqyly qyzmetterin toqtata alady. Al JShS úshin kásipti taratý tetigi jeke kabınette mártebeni qadaǵalaý múmkindigimen jeńildetilgen tártipke sáıkes ótinish berý joly qarastyrylǵan.

Bul servıstiń iske qosylýy JK toqtatý men JShS taratýdyń qoldanystaǵy tártibin ózgertpeıtinin aıta ketken oryndy. Barlyq rásim burynǵydaı elimizdiń salyq zańnamasymen retteledi. Tyń fýnktsııa tsıfrly ózara is-qımyl arqyly protsesti jaıly, qoljetimdi jáne ashyq etedi.

Osy qyzmetti iske qosý kezeń-kezeńimen júzege asyrylyp keledi. Birinshi kezeńde servıs jeke kásipkerlerge, rezıdent zańdy tulǵalarǵa jáne olardyń fılıaldaryna (rezıdent zańdy tulǵalardyń qurylymdyq bólimshelerine) qoljetimdi bolady. Bolashaqta servıstijeke praktıkamen aınalysatyn tulǵalar, birlesken jeke kásipkerlikke qatysýshylar, sondaı-aq birigip qaıta qurylymdaýdan ótip jatqan zańdy tulǵalar paıdalana alady.

JK úshin ótinish berýden bastap túpkilikti nátıjeni alǵanǵa deıingi barlyq protsess avtomatty túrde júzege asyrylady. JShS úshin qyzmet ishinara avtomattandyrylǵan, alaıda eki jaǵdaıda da qajetti rásim Qarjy mınıstrliginiń servısteri tarapynan tolyqtaı elektrondy formatta oryndalady.

QR Qarjy vıtse-mınıstri Áset Turysovtyń aıtýynsha, KBJK bızneske baǵyttalǵan birtutas tsıfrly ekojúıe retinde birizdi túrde damyp keledi. Munda kásipkerlerge memlekettik qyzmetter jaıly onlaın-formatta kórsetiledi.

— Biz jeke kabınettiń múmkindikterin keńeıtýdi jalǵastyramyz. Osy arqyly bıznes kóptegen máseleni qashyqtan sheshetin bolady. Tsıfrly servıs JK qyzmetin toqtatýdan bastap JShS taratýǵa deıingi protsesti tez, yńǵaıly jáne qajetsiz ákimshilik kedergilersiz ótýge múmkindik beredi, — dedi Áset Nurlanuly.

Tyń tetiktiń tıimdiligi:

• JK qyzmetin toqtatý nemese JShS onlaın rejimde taratýǵa ótinish berý;

• túrli memlekettik organdar men aqparattyq júıelerge júginýden arylý;

• ótinishti rásimdeýdiń qarapaıym jáne túsinikti tártibi;

• jeke kabınette óz mártebeńdi baqylaý múmkindigi;

• KBJK biryńǵaı akkaýnty arqyly qyzmetterdi alý.

Qyzmetti qalaı paıdalanýǵa bolady?

• ETsQ jáne SMS-kod kómegimen portalǵa kirý.

• Qajet bolǵan jaǵdaıda «Profıl» bóliminde JK nemese zańdy tulǵanyń rólin tańdaý.

• Qyzmetti toqtatý nemese taratý týraly ótinish berý servısine ótý.

• Qajetti málimetterdi toltyrý.

• Ótinishke elektrondy tsıfrly qoltańbamen qol qoıý.

• Jeke kabınette ótinishtiń qaralýyn qadaǵalaý.