Qarjy mınıstrligi byltyr salyq boıynsha jospar nege oryndalmaǵanyn túsindirdi

- Bıýdjet túsimderi 98,8 paıyzǵa oryndalyp, 21 trln 382 mlrd teńgeni qurady. Shyǵystar 25 trln 447 mlrd teńgege nemese 98,8 paıyzǵa iske asty. Bıýdjet tapshylyǵy 4 trln 65 mlrd teńge nemese jalpy ishki ónimniń 2,5 paıyzyna jetti, - dedi D. Temirbekov.

Onyń aıtýynsha, salyqtar boıynsha jospar 730 mlrd teńgege oryndalmady (nemese jospardyń 95,2%-y). Al salyqqa jatpaıtyn túsimder boıynsha jospar 388 mlrd teńgege asyra oryndaldy. Sáıkesinshe, respýblıkalyq bıýdjettiń menshikti kiristeri 336 mlrd teńgege kem oryndaldy.

Salyqtar boıynsha jospardyń oryndalmaýy negizinen korporatıvtik tabys salyǵy jáne qosylǵan qun salyǵy esebinen qalyptasty.

Jospardyń oryndalmaýynyń negizgi faktorlary:

- 2025 jylǵa bekitilgen bıýdjetpen salystyrǵanda munaı baǵasynyń 6 AQSh dollaryna tómendeýi;

- úshinshi eldermen eksport kóleminiń 2,4%-ǵa nemese 1,7 mlrd AQSh dollaryna tómendeýi;

- 2025 jylǵy kedendik tólemder men salyqtar boıynsha jeńildikter kóleminiń 2024 jylmen salystyrǵanda 204 mlrd teńgege nemese 17%-ǵa ulǵaıýy.

- Osy faktorlarǵa jáne geosaıası jaǵdaıǵa baılanysty 134 iri kásiporyn boıynsha respýblıkalyq bıýdjetke salyq túsimderi 709,3 mlrd teńgege nemese 36%-ǵa azaıdy. Jyl basynan beri bızneske 1,4 trln teńge somasynda qosylǵan qun salyǵy qaıtaryldy, bul 2024 jylmen salystyrǵanda 138 mlrd teńgege kóp. Jalpy alǵanda, 2024 jylmen salystyrǵanda kirister (transfertterdi eseptemegende) 1,8 trln teńgege ósti. Ósý qarqyny 113,2% qurady, onyń ishinde salyq túsimderi 2,2 trln teńgege ósti nemese ósý qarqyny 117,5% qurady, - dedi vıtse-mınıstr.

Budan buryn habarlanǵandaı, búgin Parlament Májilisinde QR Úkimetiniń jáne QR Joǵary aýdıtorlyq palatasynyń 2025 jylǵy respýblıkalyq bıýdjettiń atqarylýy týraly esepteri tanystyryldy.