Qarjy mınıstrligi azamattardyń bankterdegi qaldyq qarajatyn tekseredi
ASTANA. KAZINFORM – Qarjy mınıstrligi ekinshi deńgeıli bankterden el azamattarynyń banktik esepshotyndaǵy qaldyq qarajatyn suraıtyn bolady. Bul týraly Memlekettik kirister komıteti Jeke tulǵalardyń kiristerin ákimshileý basqarmasynyń basshysy Dına Qusaıynova málim etti.
Aıta keteıik, búgin Úkimet otyrysynda Premer-Mınıstr 2025 jyly azamattardyń qalǵan sanattaryn aktıvter týraly deklaratsııalardy mindetti túrde tapsyrýdan bosatý týraly Qarjy mınıstriniń usynysyn qoldaǵan bolatyn. Degenmen, ol Qarjy jáne Tsıfrlandyrý mınıstrlikteri tirkeý jáne salyqtyq baqylaý úshin barlyq tsıfrlyq bazalardan, onyń ishinde ekinshi deńgeıdegi bankterden málimetter alýdy qamtamasyz etkeni jón ekendigin aıtqan edi.
Onyń atap ótýinshe, el azamattary banktik esepshottaryndaǵy qaldyǵyn, páteri men kóligin qosa alǵanda barlyq aktıvin deklaratsııalaý tıis bolatyn. Alaıda, 2020 jyly azamattardy atalǵan málimetterdi deklaratsııada kórsetýden bosatý týraly sheshim qabyldandy. Óıtkeni, mundaı málimetterdiń bári tsıfrlyq derekter bazasy arqyly qoljetimdi bola tústi.
«Máselen, men memlekettik qyzmetshi retinde 2021 jyly deklaratsııa usyndym. Ókiletti organdarda tirkelgen múlkimdi, páterimdi, kóligimdi kórsetken joqpyn. Óıtkeni, bul málimetter, banktik esepshotymdaǵy qaldyq týraly derek bar. Bank mundaı málimetterdi memlekettik kirister organyna beredi», - dedi ol.
Dana Qusaıynovanyń aıtýynsha, 2025 jyldyń 1 qańtarynan jalpyǵa ortaq deklaratsııalaý júıesine kiretin azamattarǵa qatysty málimetterdi Qarjy mınıstrligi olar táýekel aımaǵyna ilikken jaǵdaıda bankterden suratatyn bolady.
«Aıtalyq, uıym (jumys orny) azamattyń 1 jylǵy tabysynyń mólsherin 10 mln teńge dep kórsetip, málimet usyndy delik. Al derekter bazasynan onyń 50 mln teńgege páter satyp alǵany anyqtaldy. Mundaı jaǵdaıda biz bankten onyń kredıt alǵan ne almaǵanyn surap saýal jiberemiz. Eger bank onyń kredıt almaǵanyn aıtsa, onda kiris pen satyp alynǵan múliktiń quny arasyndaǵy aıyrmashylyq negizsiz sanalady. Biz azamatqa mundaı somany qaıdan alǵanyn túsindirý jáne 10 paıyz mólsherinde salyq tóleý týraly habarlama jiberemiz», - dedi basqarma basshysy.
Búgin Úkimet otyrysynda Qarjy mınıstri Mádı Takıev deklaratsııa tapsyrýdan bosatylatyn sanatty ataǵan edi.
Osy oraıda Premer-Mınıstr Oljas Bektenov jeke tulǵalardyń aktıvteri boıynsha barlyq aqparat bar ekenin atap ótken bolatyn.
Aıta keterligi, buǵan deıin Prezıdent deklaratsııalaýǵa qatysty máseleni jan-jaqty pysyqtaýdy tapsyrdy.