Qarjy mınıstrligi áleýmettik tólemder men ınflıatsııanyń araqatynasy boıynsha túsinik berdi

ASTANA. KAZINFORM — Qarjy vıtse-mınıstri Erjan Birjanov ınflıatsııa deńgeıi men áleýmettik tólemderdi ındeksteý araqatynasyna túsinikteme berdi. Búgin Parlament Májilisiniń jalpy otyrysynan keıin tilshiler eldegi ınflıatsııanyń 12 paıyzdan asqanyn, al bazalyq zeınetaqy, sondaı-aq járdemaqylar 10 paıyzǵa ǵana ındekstelgenin atap ótti.

Buǵan jaýap retinde vıtse-mınıstr 2026 jylǵa Qazaqstanda áleýmettik salaǵa 10,5 trln teńge bólingenin aıtty.

— Endi qosymsha kómekke toqtalsaq, áleýmettik kómek bolady. Bul turǵyda osy kómekke qatysty tekserilip jatyr. Áleýmettik kómek - ataýly bolýy kerek. Atap aıtqanda, teris áreketter jasap otyrǵandar bolýy múmkin, ıaǵnı jalǵan mámileler jasaǵandar nemese jalǵan ajyrasý qujatyn rásimdegender anyqtalýy yqtımal. Mundaı derekter óte kóp, sondyqtan qazir tsıfrlandyrýdyń kómegimen Eńbek mınıstrligi men Densaýlyq saqtaý mınıstrligi osyndaı faktilerdi anyqtap jatyr. Osy oraıda bul adamdarǵa qatysty tólenetin soma azaıady, - dedi E. Birjanov. 

Onyń sózine qaraǵanda, bul is-sharalar qarajatty shynymen qoldaýdy qajet etetin azamattarǵa baǵyttaýǵa múmkindik beredi.

Buǵan deıin Qazaqstanda qarasha aıynda jyldyq ınflıatsııa 12,4 paıyz deńgeıinde qalyptasqanyn jazǵan edik.